शीर्ष नेतातय् दथ्वी कचमच
संविधानसभाय् मतदानय् वनीगु संभावना अप्वल
येँ(झीगु स्वनिगः)
प्रमुख दल एकीकृत नेकपा (माओवादी), नेपाली कांग्रेस, एमाले व मधेसी मोर्चाया शीर्ष नेतातय्गु दथुइ सहमतिया नितिं धकाः वार्ता याःसां झन झन कचमच जुयावःगु दु । न्हापा अनौपचारिक रुपं हे सहमति जुइ धुंकूगु विषययात कयाः नं हाकनं कचमच जुयावःगु खः ।
म्हिगः सोमवाः प्रमुख दलया शीर्ष नेतातय्गु दथुइ न्हिच्छि धैथें हे वार्ता जूसां अन्ततः छुं हे खँय् सहमति जुइ मफत । उकिं आः सहमतिइ वनीगु संभावना झन झन हे म्हो जुयावंगु दु । म्हिगः सोमवाः न्हिनय् मुँज्या च्वनाः नं विनानिष्कर्ष क्वचाःगु व क्वचाये धुनेवं नेकपा (एमाले)या नायः झलनाथ खनालं संचारकःमितलिसे खँल्हासें थः आशावादी जुइ मफत धकाः धयादीगु खः । उगु हे कथं कांग्रेसया नेता अर्जुननरसिंह केसीं विवाद झन झन तच्वयावःगुलिं आः संविधानसभाय् मतदानय् हे वनीगु संभावना अप्वयाःवःगु दु धकाः धयादीगु दु । वय्कलं संचारकःमितलिसे खँल्हासें धयादिल ‘मुँज्याय् छुं नं खँ सकारात्मक रुपं मवन । बरु दलतय्गु दथुइ झन झन हे अविश्वास अप्वयावःगु दु ।’
विवादित विषययात कयाः सहमति याये मफत धाःसा संवैधानिक प्रक्रिया कथं संविधानसभाय् मतदानयाना निर्णय यायेमाःगु प्रावधान दुसां दलया शीर्ष नेतातय्सं उकियात बेवास्ता यानाः सहमतिया नितिं धकाः लगातार रुपं म्याद थप यानाः वयाच्वंगु खः । संविधानया मस्यौदा दयेकेत संविधानसभाय् बहुमतया आधारय् निर्णय यायेमाःगु अले मस्यौदा संविधान ज्वनाः जनतायाथाय् वनाः जनताया सुझाव बयाः हाकनं संविधानसभाय् दुई तिहाई बहुमतं पारित यायेमाःगु प्रावधान दु ।
उगु बैठकय् संविधान निर्माण व राष्ट्रिय सरकार गठनया बारे सहलह जूगु खः । लिपांगु इलय् वयाः नेपाली कांग्रेस व एमालेया नेतातय्सं राष्ट्रिय सहमतिया सरकार गठन नाप नापं जक न्हूगु संविधान निर्माणया झ्वलय् विवाद जुयाच्वंगु राज्य पुनर्संरचना व शासकीय स्वरुपया बारे प्याकेजं हे निर्णय यायेगु जुइ धकाः अडान कयाहःगुलिं हाकनं संविधान निर्माणया ज्याय् पंगः ब्वलंगु दु ।
