बेपत्ता महर्जनयात सार्वजनिक यायेत दबाब र्याली पिथन
'छोरीमैया खोजी दवाब समूह'या संयोजक राम बहादुर डंगोलं प्रत्येक नागरिकयागु जिम्मा राज्यं कायेमाःगु धयादिसें जातिया लिधंसाय् भेदभाव मयासें निला न्ह्यःनिसें तनाच्वंम्ह महर्जनयात याकनं स्वयां याकनं सार्वजनिक यायेत इनाप यानादिल ।
निला न्ह्यःनिसें बेपत्ता जुयाच्वंम्ह छोरीमैया महर्जनयात सार्वजनिक याकेगु लागि दबाब बीत शनिवाः येँय् ग्वसाः ग्वःगु दबाब राय्लियात सम्बोधन यानादिसें समूहया संयोजक नापं ज्यापु महागुथि येँ महानगर समितिया नायः राम बहादुर डंगोलं प्रधानमन्त्री नापं थी थी निकायस ज्ञापनपौ बियाः सार्वजनिक यायेत इनाप याःसां आःतक नं पहल मयाःगुलिं थुकथं दबाब राय्लि यायेमाःगु खँ धयादिल । थुगु सांकेतिक दवावयात नं वास्ता मयात धाःसा अझ सशक्त कथं न्ह्याःवनेगु धयादिल ।
ज्याझ्वलय् नेवाः जागरण मंचया नायः सुजीव बज्राचार्यं बेपत्ता जुयाच्वंम्ह महर्जनयात मालेत अलग हे आयोग दयेकेत माग यानादिसें राज्यं छुं न्हि दुने पहल मयाःसा आमरण अनशन च्वनेगु ज्याझ्वः यायेगु सहलह जुयाच्वंगु धयादिल ।
अथेहे दबाब समूहया सल्लाहकार विद्या सुन्दर शाक्यं थःपिं शान्तिपूर्ण ज्याझ्वःपाखें हे सरकारयात मालेत दबाब बियाच्वनागु खँ न्ह्यथनादिसें महर्जन बेपत्ता जुगूया जानकारी थी थी निकायस नापं प्रधानमन्त्रीयात तकं जानकारी बिउगु निला दयेधुंकाः नं सरकारं वेवास्ता यानाच्वंगुलिं थुकी गनं सुरक्षा निकायया मिलोमतो जक दुगु खःला धकाः शंका यानादिल ।
ज्याझ्वलय् बेपत्ता जुयाच्वंम्ह महर्जनया म्ह्याय् सुभद्रा महर्जनं थःपिनिगु छगू हे जक माग धइगु बेपत्ता जुयाच्वंम्ह मांयात सार्वजनिक याकेगु धयादिसें थुकी पहल यायेत सकसित इनाप यानादिल ।
येँ महानगर पालिकाया जैशीदेवलय् च्वनादीम्ह छोरीमैया महर्जन वंगु २०८६ फागुण १६ गतेनिसें तनाच्वंगु खःसा वय्कःयात सार्वजनिक याकेगु लागि थौं येँया बसन्तपुरं दबाब र्याली पिथंगु खः ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
