बेपत्ता जुयाच्वंम्ह छोरीमैंया मालेत कन्हय् जनस्तरं सतकय् प्रदर्शन याइगु

येँ(झीगु स्वनिगः)

निला न्ह्यःनिसें बेपत्ता जुयाच्वंम्ह येँ महानगरपालिका वडा नं. २१ या ५१ दँ दुम्ह छोरी मैंया महर्जन तनाच्वंगुलिं मालेत अन्ततः नेवाःत सतकय् हे क्वाहां वइगु जूगु दु ।
अपराधीयात ज्वनाः कारवाही यायेमाःगु नापं छोरीमैंया महर्जनयात मालेमाःगु माग यानाः न्हापांगु सतक संघर्षया ज्याझ्वः कथं कन्हय् मंगलवाः जनस्तरं सतकय् प्रदर्शन याइगु जूगु दु ।

उगु जुलुस येँया थाय् थासय् चाः हिलाः सभा यानाः क्वचायेकीगु धाःगु दु । वंगु फागुन १६ गतेनिसें बेपत्ता जुयाच्वंम्ह छोरीमैंया महर्जनयात आः तक नं मालेत राज्यं माःगु कथं भूमिका म्हितेगु ज्या मयाःगुलिं सरोकारवालातय्त दबाव बिइगु नितिं धकाः अथे नेवाःतय्सं प्रदर्शन यायेत्यंगु खः ।

जनस्तरं छोरीमैंया महर्जनयात मालेगु नितिं नीस्वंगु दबाव समुहया ग्वसालय् मंगलवाः सुथय् येँया बसन्तपुरय् मुनाः प्रदर्शन यायेत्यंगु खः । म्हिगः आइतवाः उगु दबाव समुहया ग्वसलय् जूगु छगू तःजिगु भेलां अथे सतकय् हे क्वहां वनेगु धकाः निर्णय याःगु खः । दबाव समुहपाखें छोरीमैंया महर्जनयात मालेत माग यानाः प्रधानमन्त्री डा. बाबुराम भट्टराई, गृहमन्त्री, प्रमुख राजनीतिक दलया प्रमुख नेतातय्त तकं ज्ञापन पौ लःल्हाये धुंकूगु अवस्था दु । ता ई न्ह्यःनिसें तनाच्वंम्ह छोरीमैंया मालेत माग यानाः प्रहरीयाथाय् निवेदन दर्ता याःवंगु इलय् प्रहरीं दर्ता तकं मयानाच्वंगु अवस्थाय् ब्यापक जनदवावया दथुइ छुं दिं न्ह्यः जक प्रहरीं उगु घटनायात कयाः दर्ता यायेगु ज्या तकं जुइ धुंकूगु दु । कन्हय् अथे सतकय् प्रदर्शन यानाः माग याःसां नं मालेगु ज्याय् राज्यं प्राथमिकता मबिल धाःसा अझ सशक्त कथं आन्दोलन यायेगु जुइ धकाः नं दबाव समूहपाखें धाःगु दु ।