सभासद्तपाखें माधव नेपालयात हुटिङ

येँ(झीगु स्वनिगः)

नेकपा (एमालें)या बरिष्ठ नेता माधवकुमार नेपालयात थीथी दलया सभासद्तय्सं हे हुटिङ याःगु दु । म्हिगः आइतवाः संविधानसभाया संवैधानिक समितिया बैठकय् एमालेया नेता नेपालं थःगु खँ तयाः पिहां वनेत्यंगु इलय् अथे बैठकय् उपस्थिति जुयादीपिं सभासद्तय्सं हुटिङ यानादीगु खः । एमालेया नेता नेपालं शीर्ष नेतातय्गु बैठक दुगुलिं थः लिमलाः धकाः पिहां वनेत्यंगु इलय् प्रमुख दलया शीर्ष नेतातय्सं जक सहमति यानाः संविधान जारी याये दैमखु धकाः अथे हुटिङ यानादीगु खः ।

नेपालं आःया अवस्थाय् राज्य पुनर्संरचनाया सवालय् नेतातय् दथुइ निर्णायक वार्ता जुयाच्वंगु नापं माल धाःसा संविधानसभाया लच्छि म्याद थप यानाः जूसां नं सहमतिया आधारय् राज्य पुनर्संरचना यानाः न्हूगु संविधान जारी यायेमाः धकाः धयादीगु खः ।
वय्कलं अथे थःगु विचाः तयाः पिहां वनेत्यंगु इलय् मधेसी जनअधिकार फोरमया नायः नापं सभासद् उपेन्द्र यादवं संविधानसभा व सम्वन्धित समितियात बाइपास यानाः स्वंगू दलया खुम्ह जक शीर्ष नेतातय्सं दयेकीगु संविधानयात जनतां स्वीकार मयाइगु अले थःपिन्सं नं स्वीकार यायेफैगु अवस्था मदु धकाः धयादीगु खः ।

बैठकय् सभासद्तय्गु उगु खँ शीर्ष नेतातय्गु बैठकय् तकं थ्यंकादीत नेता यादवं एमालेया नेतायात इनाप यानादीगु खः । अथे प्रमुख दलया मेमेपिं शीर्ष नेतात हे संवैधानिक समितिइ उपस्थिति मजुइवं बैठकं छुं हे निर्णय यायेमफुगु अवस्था वःगु खः । लगातार रुपं प्रमुख दलया शीर्ष नेतातय्सं सहमतिया नामय् अन्तिम इलय् वयाः म्याद थप यायेगु अले संविधानसभाय् सहलह मयासे थःपिं जक च्वनाः न्हूगु संविधान जारी यायेगु नितिं कुतः यानाच्वन धकाः ता ई न्ह्यःनिसें हे संविधानसभाया संवैधानिक समितिइ दुथ्याःपिं मेमेगु दलया नेतातय्सं आपत्ति प्वंकाः वयाच्वंगु खः ।