पहिचानया आधारय् राज्य पुनर्संरचनाया सवालय् कांग्रेस याकःचा
संविधानसभाया बैठक १९ गते
येँ(झीगु स्वनिगः)
न्हूगु संविधान निर्माणया झ्वलय् प्रमुख विवादित जुयाच्वंगु विषय राज्य पुनर्संरचनाया सवालय् पहिचानया आधार नालेगु सवालय् संविधानसभाया प्रमुख प्यंगू शक्ति छथाय् लाःवंगु दुसा कांग्रेस याकःचा जूगु दु । पहिचानया आधारय् राज्य पुनर्संरचना यायेगु सवालय् एकीकृत नकेपा (माओवादी), एमाले व मधेसी मोर्चा छथाय् लाःवंगु दुसा कांग्रेस धाःसा याकःचा लाःगु खः ।
न्ह्याबलें थःपिन्त सहयोग यानाः वयाच्वंगु धकाः एमालेयात थः लिक्क च्वंगु शक्ति कथं कांग्रेसं नालाः वयाच्वंगु खःसा लिपांगु इलय् वयाः नेता व कार्यकर्तातय्गु व्यापक दबावया दथुइ एमालें नं संविधानसभाया राज्य पुनर्संरचना तथा राज्य शक्ति बाँडफाँट समितिं तयार याःगु झिंप्यंगू प्रदेशया आधारय् हे राज्य पुनर्संरचना यायेमाः धकाः स्थायी समितिं १३ प्रदेशया निर्णय यानाः माओवादी व मधेसी मोर्चालिसे सहलह लिपा १२ प्रदेशया प्रस्ताव प्यंगू राजनीतिक शक्तिया बैठकय् प्रस्ताव तयेवं कांग्रेस झस्केजूगु खः । उकिं थ्व इलय् कांग्रेसयात तसकं हे दवाबा जूवंगु दु ।
थ्व हे दथुइ एमालेया उगु निर्णययात कयाः पार्टी दुनेया ब्रम्हुवादी नेतातय्सं पार्टीया नायः झलनाथ खनालयात घेराबन्दी यायेगु सुरु यानाहःगु दु । वंगु शनिवाः स्थायी समितिया मुँज्या क्वचाःगु इलंनिसें हे ब्रम्हुवादी नेतातय्सं पार्टीया नायःयात घेराबन्दी यायेगु ज्या न्ह्याकूगु खः धकाः एमालेया छम्ह नेतां जानकारी बियादीगु दु । सहमतिया नितिं लगातार रुपं म्याद थप यानाः वयाच्वंपिं प्रमुख स्वंगू दल एकीकृत नेकपा (माओवादी), नेपाली कांग्रेस व एमाले नाप. मधेसी मोर्चाया इनाप कथं संविधानसभाया बैठक हाकनं लिछ्याःगु दु ।
संविधानसभाय् सुचं तिकाः वइगु १९ गते जक अथे बैठक च्वनेगु धकाः जानकारी ब्यूगु दु । संविधान निर्माणया झ्वलय् राज्य पुनर्संरचना व शासकीय स्वरुपया बारे सहलह यायेगु नितिं ई मगात धकाः प्रमुख दलया शीर्ष नेतातय्सं म्हिगः अन्तिम इलय् वयाः इनाप याःगुलिं अथे संविधानसभाया बैठक १९ गते तकया नितिं लिछ्याःगु खः ।
यदि अथे संविधानसभाया बैठक लिछ्यायेगु ज्या मजूगु खःसा म्हिगः आइतवाः हे संविधान निर्माणया झ्वलय् विवादित विषययात कयाः संविधानसभाय् मतदान यायेमाःगु खः ।
