एमालेपाखें १३ प्रदेश तकया प्रस्ताव याइगु

केपी ओली व विद्या भण्डारीपाखें नोटअफ डिसेण्ट

येँ(झीगु स्वनिगः)

नेकपा (एमालें)या स्थायी समितिया मुँज्यां १३ प्रदेशया प्रस्ताव याःगु दु । राज्य पुनर्संरचनाया सवालय् एमालें संविधानसभाया राज्य पुनर्संरचना नापं राज्य शक्ति बाँडफाँट समितिपाखें प्रस्ताव याःगु १४ प्रदेश मध्ये जडान छगू प्रदेश लिकयाः अथे १३ प्रदेशया प्रस्ताव याःगु खः । म्हिगः शनिवाः च्वंगु स्यायी समितिया मुँज्याय् उगु निर्णयप्रति असहमति प्वंकुसें ब्रम्हुवादी नेता कथं म्हस्यूम्ह केपी शर्मा ओली व विद्यादेवि भण्डारीं नोटअफ डिसेण्ट च्वयादीगु खः । एमालेपाखें प्रदेशया नांया सवालय् भौगोलीक व जातीय पहिचानया नां दुथ्याकाः नां तयेगु धकाः नं निर्णय याःगु दु ।
एमालेया उगु प्रस्तावयात कयाः कांग्रेसलिसे वार्ता यायेत शीर्ष नेता माधवकुमार नेपालया नेतृत्वय् छगू वार्ता पुचः तकं दयेकूगु दु । न्हापा न्हापा जातीय पहिचानया आधारय् राज्य पुनर्संरचना याये मजिउ धकाः अडान कयाः वयाच्वंपिं एमालेया केन्द्रीय नेतात विष्णु पौडेल, सुरेन्द्र पाण्डे, गोकर्ण विष्ट लगायतया नेतातय्सं वंगु शुक्रवाः च्वंगु केन्द्रीय कमिटीया मुँज्याय् १३ प्रदेशया प्रस्ताव यानादीगु खः ।

अथे आकाझाकां प्रस्ताव यानादीगु धैगु छखे आदिवासी जनजाति, मधेसी नापं राज्यं बहिस्करणय् लाकातःपिं समुदाय छप्पँ जुयावः खःसा मेखे प्रदेश म्हो यायेगु इलय् खय् ब्रम्हुतय्गु हे प्रदेश म्हो जुइगुलिं अथे प्रस्ताव तःगु खयेमाः धकाः अनुमान यानाहःगु दु । जडान प्रदेश धैगु भोते लामातय्गु पहिचानया आधारय् दयेकूगु प्रदेश खःसा उकियात लिकयाः आः कर्णालीइ तयेगु धैगु खय् ब्रम्हुतय्गुनितिं बांलाःगु ज्या जुइगु तायेकाः हे अज्वःगु कथंया १३ प्रदेशया प्रस्ताव तःगु खयेमाः धकाः धयाहःगु दु । विशेष यानाः माओवादीया नायः प्रचण्डं भुगोल व जातिया आधारय् प्रदेशया नां तयेगु धकाः प्रस्ताव यायेवं एमाले नं उगु हे लँपुइ वंगु दु धकाः एमालेया छम्ह नेतां जानकारी बियादीगु दु ।

न्हूगु संविधान निर्माणया नितिं प्रमुख स्वंगू दल व मधेसी मोर्चाया शीर्ष नेतातय्सं सहमतिया नितिं धकाः लगातार म्याद थप यानाः वयाच्वंगु म्हिगः शनिवाः हाकनं फूगु दु थौं आइतवाः तकया दुने नं सहमति मजुल धाःसा हाकनं सहमतिया नितिं म्याद थप यायेगु अथवा मतदानया आधारय् विवादित विषययात निर्णय यायेमाःगु बाध्यकारी अवस्था दु ।