अन्ततः राज्य पुनर्संरचना समितिया प्रस्तावय् हे जनमत ब्वलनावल

१२ प्रदेशय् सहमत जुल, निगू प्रदेशयात कयाः छलफल

येँ(झीगु स्वनिगः)

न्हूगु संविधान निर्माणया झ्वलय् एकीकृत नेकपा (माओवादी)या नायः पुष्पकमल दाहाल प्रचण्डं झिगू प्रदेशया प्रस्ताव तयेवं अन्ततः संविधानसभाया राज्य पुनर्संरचना समितिपाखें तयार याःगु १४ प्रदेशया सवालय् १२ प्रदेशय् म्हिगः बहनि लिबाक्क तक्कयादुने प्यंगू दल सहमत जूगु दु । लिपांगु इलय् आदिवासी जनजाति नापं मेमेगु समुदायपाखें नं बरु १४ प्रदेशय हे पायछि जू धकाः धयाहःगुलिं आः वयाः १४ प्रदेशया पक्षय् जनमत अप्वयावल धकाः मनूतय्सं टिप्पणाी यानाहःगु दु ।

थ्व हे दथुइ एकीकृत माओवादीया नायः प्रचण्डं १० प्रदेशया सवालय् नेपाली कांग्रेसं सहमति मजुल धाःसा थःम्हं संविधानसभाया राज्य पुनर्संरचना नापं राज्य शक्ति बाँडफाँट समितिपाखें प्रस्ताव याःगु १४ प्रदेशया प्रस्तावय् हे संविधानसभाय् मतदातनय् वनेगु जुइ धकाः धयादीगु दु । वय्कलं थःम्हं सहमतिया नितिं धकाः झिगू प्रदेशया प्रस्ताव तयागु खःसा कांग्रेस सहमति मजुल धाःसा संविधानसभाय् १४ प्रदेशया सवालय् मतदानय् वनेगु जुइ धकाः धयादीगु खः ।

थ्व हे झ्वलय् हिमाली क्षेत्रया सभासद्तय्सं राज्य पुनर्संरचनाया झ्वलय् शेर्पा व जडान प्रदेशया माग यानाः एकीकृत माओवादीया नायः पुष्पकमल दाहाल प्रचण्डयात, एमालेया नायः झलनाथ खनाल लगायतया शीर्ष नेतातय्त ज्ञापन पौ बिइगु ज्या याःगु दु । म्हिगः शनिवाः ज्ञापन पौ लःल्हासें हिमाली क्षेत्रया सभासद्तय्सं यदि थःपिनिगु माग पूरा मजुल धाःसा राज्य पुनर्संरचनायात प्रस्तावयात स्वीकार यायेगु जुइमखु धकाः ख्याच्वः बियादीगु खः । ज्ञापन पौ लःल्हानाकासें प्रचण्डं झिगू प्रदेश दुने शेर्पा व जडानयात विशेष क्षेत्रया रुपय् दुथ्याकागु दु धकाः लिसः बियादीगु खःसा अथे हे एमालेया नायः खनालं हिमाली जनजातिया मागयात शीर्ष नेतातय्गु बैठकय् तयाबिइ धकाः बचं बियादीगु खः ।

हिमाली क्षेत्रया जनजाति व सभासद्तय्सं संविधान सभाया राज्य पुनर्संरचना नापं राज्य शक्ति बाँडफाँट समितिपाखें तयार याःगु १४ प्रदेशयात हे यथावत यानाः राज्य पुनर्संरचना यायेमाःगु नापं जेठ १४ गते हे न्हूगु संविधान जारी यायेमाःगु माग याःगु खः ।
हिमाली जनजाति कार्यकर्ता व नेतातय्सं थःपिनिगु माग पूरा मजुल धाःसा आन्दोलन यायेगु जुइ धकाः ख्याच्वः तकं बियादीगु खः ।

‘नेवाः नेपालमण्डल’ प्रदेश दयेकेत नेवाःतय्गु माग

राज्य पुनर्संरचनाया सवालय् नेवाःतय्सं नेवाः प्रदेशया नां नेवाः वागमती प्रदेशया थासय् नेवाः नेपालमण्डल तयेमाः धकाः माग यानाहःगु दु । विशेष यानाः एकीकृत माओवादीया नायः प्रचण्डं लिपांगु इलय् तयादीगु नेवाः वागमती प्रदेशया नांप्रति असहमति प्वंकुसें फयां फत्तले नेवाः प्रदेश मखुसा नेवाः नेपालमण्डल प्रदेशया नां तयेमाः धकाः माग यानाहःगु दु ।

नेवाः स्वायत्त राज्यया नितिं आन्दोलन यानाः वयाच्वंगु नेवाः स्वायत्त राज्य मंकाः संघर्ष समितिया न्ह्यलुवातसें माओवादीया नायः प्रचण्डया निवासय् हे वनाः वय्कःयात वंगु शुक्रवाः नापलानाः अथे माग यानादीगु खः । उगु इलय् प्रचण्डं नेवाःतय्गु मागयात सकारात्मक रुपं कयादीगु दु धकाः छम्ह नेवाः नेतां जानकारी बयादीगु दु ।