ब्रिटिस गोर्खा कपया उपाधि पुलिसयात

दक्कलय् अप्वः राशीया सिरपाः दुगु ब्रिटिस गोर्खा कप फुटबलया उपाधि नेपाल पुलिस क्लबं त्याकूगु दु ।

त्रिपुरेश्वरय् च्वंगु दशरथ रंगशालाय् शनिवाः जूगु बिजं कासाय् निक्वः तक त्याकेधुंकूगु थ्रीस्टार क्लबयात निगू गोलं बुकूसें पुलिसं उगु उपाधि त्याकूगु खः । उपाधिया नापनापं झिगू लख तका सिरपाः नं त्याकूगु दु । उपविजेता थ्रीस्टार क्लबं धाःसा न्यागू लख तकाय् चित्त बुझे यायेमाःगु खः ।

कासाया १५गू मिनेटय् योगेश श्रेष्ठया गोलपाखें न्ह्यःने लाःगु पुलिस क्लबया लागि २९गू मिनेटय् भरत शाह नं मेगू गोल याःगु खः । न्हापांगु हाफय् हे निगू गोलं न्ह्यःने लाःगु पुलिस क्लबं निगूगु हाफय् रक्षात्मक कासा म्हितूगु खः ।

'ए' डिभिजन नापं राष्ट्रिय लिग त्याकूगु पुलिसं थुगु कप न्हापांखुसी त्याकूगु खःसा न्हापाया निगू संस्करणय् मनाङ्ग मर्स्याङ्गदीयात बुकूसे थ्रीस्टार क्लबं उपाधि त्याकूगु खः ।

धेंधेबल्लाय् उत्कृष्ट प्रशिक्षक कथं पुलिसया विराटकृष्ण श्रेष्ठ, उत्कृष्ट गोल रक्षक पुलिसया हे रीतेश थापा व उत्कृष्ट फरवार्ड पुलिसया हे योगेश श्रेष्ठ घोषित जुल ।

अथेहे उत्कृष्ट डिफेन्डरय् थ्रीस्टारया विराज महर्जन व उत्कृष्ट मिडफिल्डर थ्रीस्टारया हे विशन गौचन जुल । वय्कःपिन्सं सिरपाः कथं न्यय्द्वः/ न्यय्द्वः तका त्याकूगु दु ।

More Stories Like this