पहिचान सहितया संघीयताय् कम्प्रोमाइज जुइमखु : प्रचण्ड
एनेकपा (माओवादी)या नायः पुष्पकलम दाहाल ‘प्रचण्डं’ पहिचान सहितया संघीयताय कम्प्रोमाइज मजुइगु खँ धयादीगु दु ।
लाजिम्पाटय् च्वंगु थःगु हे छेँय् शुक्रवाः डेलिगेशन वःपिं नेवाः स्वायत्त राज्य मंकाः संघर्ष समितिया प्रतिनिधित नाप खँल्हाबंला यानादिसें वय्कलं पहिचान सहितया संघीयता व प्रत्यक्ष निर्वाचित कार्यकारीया अडान मत्वःतेगु न्ह्यःथनादिल ।
'पहिचान सहितया संघीयता व प्रत्यक्ष निर्वाचित कार्यकारी त्वःतेगु खँ जुइमखु' वय्कलं धयादिल, 'थ्व निगु माग त्वःतुसा परिवर्तन व संघर्षया चाहना सम्बोधन जुइमखु ।'
वय्कलं माओवादी न्ह्यःब्वःगु झिगू प्रदेशया मागय् दलतय्सं सहमति यायेत अलमल याःसा थःपिंसं आः प्रदेश म्हो यायेगु मखु अझ अप्वः यायेगु अडान कायेगु धयादिल । वय्कलं धयादिल, 'कांग्रेस–एमालें झिगू प्रदेशय् सहमति मयाःसा आः झीसं झिंनिगू प्रदेश, उकी नं मजूसां झिंप्यंगू प्रदेशया अडान कायेगु जुइ ।'
डेलिगेशन वःपिं नेवाःतय्सं नेवाःतय् आदिभूमी व थनया इतिहासयात स्वीकार यासें नेवाः प्रदेशया नां नेवाः–बाग्मतीया पलेसा नेवाः-नेपालमण्डल तयेमाःगु व नेवाः प्रदेशया छुं नं हालतं राजधानी प्रदेश स्वीकार यायेमफइगु खँ न्ह्यःथंगु खः ।
मंकाः संघर्ष समितिया सचिवालय कजि मल्ल के. सुन्दरं झिगू प्रदेशय् नेवाः प्रदेशय् दुथ्याकूगुलिं उकीयात लसकुस यानादिसें उकी सम्झौता मयायेत इनाप यानादिल । वय्कलं देय्या केन्द्रीय राजधानी येँ नं पिने यंकूसां नेवाः प्रदेशयात राजधानी प्रदेश कथं स्वीकार यायेमफइगु धयादिल ।
अथेहे संस्कृतिविद् सत्यमोहन जोशी, सभासद् मंगलसिद्धि मानन्धर, नेवाः न्ह्यलुवा पद्मरत्न तुलाधार व राजेन्द्र श्रेष्ठं नेवाः–बाग्मती धकाः प्रस्ताव याःगु नां स्वीकार्य मजूगु धासें खुसीया नां जोडे यायेगु स्वयां थनया इतिहास पिब्वयइगु कथं नेवाः–नेपालमण्ड नां तयेत इनाप यानादीगु खः ।
उगु डेलिगेशन पुचलय् भूमिसुधार राज्य मन्त्री दिलिप महर्जन, नेवाः देय् दबूया नायः नरेश ताम्राकार, डा. चुन्दा बज्राचार्य, नरेशवीर शाक्य, केबी घ:जु, सुजीव बज्राचार्य, राजेश शाक्य लगायतया ब्वति दुगु खः ।
