प्यम्ह नेतायात जिम्माया ‘नाटक’

येँ(झीगु स्वनिगः)

न्हूगु संविधानया नितिं विवाद जुयाच्वंगु विषययात कयाः सहमतिया नितिं धकाः कुतः यानाच्वंपिं प्रमुख स्वंगू दलया शीर्ष नेता नापं मधेसी मोर्चाया नेतायात ल्यंदनिगु विषययात कयाः सहमति यायेगु भाला ब्यूगु दु । आः सहमति यायेत ल्यंदनि धाःगु राज्य पुनर्सरचना व शासकीय स्वरुपया बारे सहमति यायेगु नितिं अथे स्वंगू दल व मधेसी मोर्चाया यानाः प्यम्ह नेतातय्त भाला ब्यूगु खः ।

न्यायपालिका, निर्वाचन प्रणालीया बारे सैद्धान्तिक रुपं सहमति जुइ धुंकूगु विषययात कयाः नं ठोस रुपं प्रस्ताव हयेगु ज्या प्यम्ह नेतातय्सं यानादी धाःगु दु ।
म्हिगः स्वंगू दल व मधेसी मोर्चाया मुँज्यालिपा कांग्रेसया नेता अर्जुन नरसिंह केसीं संचारकःमितय्त धयादिल ‘इपिं प्यम्ह नेतातय्सं थौं विहिवाः तकया दुने विवादित विषययात कयाः सहमति यानाः प्रस्ताव हयेगु जिम्मा काःगु दु ।’ एकीकृत नेकपा (माओवादी)या नायः पुष्पकमल दाहाल प्रचण्ड, कांग्रेसया सभापति सुशील कोइराला, एमालेया नायः झलनाथ खनाल व मधेसी मोर्चाया नेता विजय गच्छेदारयात भाला ब्यूगु खः ।

ता ई न्ह्यःनिसें व हे स्वंगू दलया स्वम्ह व मधेसी मेर्चाया नापं यानाः प्यम्ह नेतातय्सं सहमतिया नितिं धकाः लगातार वार्ता यानाः संवैधानिक प्रक्रिया कथं संविधानसभाय् मतदानय् मवंसे सहमतिया नितिं धकाः म्याद जक थप यानाः वयाच्वंगु खःसा आः वयाः व हे प्यम्ह नेतातय्त सहमतिया नितिं धकाः भाला ब्यूगुलिं राजनीतिक विश्लेषकतय्सं मेगु नाटक यात धकाः तिप्पणी यानाहःगु दु ।

जाति व भूगोलया नामं प्रदेश दयेकेगु ख“य् सहलह

राज्य पुनर्संरचनाया सवालय् पहिचानयात प्रमुख आधार दयेकेमाः धकाः एमालेया मधेसी, जनजाति नेतातय्सं तसकं दबाव बिइवं अन्ततः उगु पार्टीया शीर्ष नेतात जातीय पहिचान नापं भूगोलया नं नां स्वाकाः प्रदेशया नां कथं प्रस्ताव तयेगु नितिं तयार जूगु दु ।

एमालेया छम्ह नेतां बियादीगु जानकारी कथं जातीय पहिचान व भूगोलयात स्वाकाः प्रदेशया नां तयेगु सवालय् नेवाः प्रदेशयात नेपालमण्डल नेवाः प्रदेश धकाः नां तयेगु प्रस्ताव यायेमाः धैगु पक्षय् तक वःगु दु । अथे हे एमालेया शीर्ष नेतातय्सं लिपांगु इलय् वयाः राज्य पुनर्संरचनाया झ्वलय् झिगू प्रदेशया प्रस्ताव तइगु अवस्था ब्वलंगु दु ।

एकीकृत माओवादीया नायः पुष्पकमल दाहाल प्रचण्डं लिपांगु इलय् वयाः गुंगू प्रदेशया प्रस्ताव तयादीगु खःसा गुंगू प्रदेश धैगु माओवादीया जनयुद्धकालय् हःगु हे प्रस्ताव जूगुलिं उकियात स्वीकार याये फैमखु धकाः एमालेया नेतातय्सं झिगू प्रदेशया प्रस्ताव तयेगु तयारी याःगु दु धकाः धाःगु दु ।