१० अर्बया भ्रष्टाचार अख्तियारयात अनुसन्धान याकीगु

झिदँया महान जनयुद्ध यानाः नेपालय् अग्रगमनया लुखा चायेकेत ताःलाःगु एकीकृत नेकपा माओवादी शिविर कमाण्डरतय्सं करोडौंया भ्रष्टाचार यात धयागु खँ सार्वजनिक जूगु लगत्तै आः पार्टीया नायः पुष्पकमल दाहाल प्रचण्डं नं अर्बौं धेबा नःगु खँ न्ह्यःने वःगु दु । १९,००० जनसेना, विदाय् वंपिं व शिविरं बिसुंवंपिं अले बिरामी जुयाः शिविरं पिनेलाःपिनिगु लय् द्वःछि द्वःछि कयाः मुंगु करोडौं धेबाया ल्याःचाः थौं अस्पष्ट दु । थीथी शिविरय् थीथी कथं खर्च याःगु ल्याःचाः नं पारदर्शी मजू, मवः । थुकिं यानाः राज्यया अर्बौं धेबा हन्तां जूगु जक मखु, खुद सम्मानजनक सेना समायोजनय् वनेत पियाच्वंपिं स्वद्वःया हाराहारीया जनसेनात दःसां ६,५०० या संख्या आः मगाइगु जूगु दु । सेना समायोजनया ज्याय् प्रचण्ड–बाबुरामपिंसं धोका ब्यूगुलिं – वैद्य समूहपाखें न्हापा हे समायोजनय् मवंसे अनिवार्य अवकासय् वनेत धाःगु खः । शुरुइ थुगु खँयात उलि गम्भीर रुपं मकाःसां लिपा प्रचण्ड–बाबुरामपिनिगु चर्तिकला खँ खं होसय् वःपिं समायोजनय् वंपिं मध्ये नं बच्छिस्यां पुनःवर्गिकरणया आधारय् समायोजनय् मवंसे अवकाशय् वंगु खः ।
१९,००० जनसेनाया लच्छिया द्वःछिया रुपय् न्यादँया अथेहे १ अर्ब १४ करोड जूवइसा शिविरय् जूगु मेमेगु नं आर्थिक क्रियाकलाप यानाः अथेहे ९ अर्ब ५० करोडया हाराहारीइ भ्रष्टाचार जूगु अनुमान याःगु दु । थुकी बच्छिति धेबा शिविरय् च्वंपिं कमाण्डरतय्गुपाखें हिनामिना जूगु दुसा बच्छिति धेबा पार्टीया नायः प्रचण्डपाखें उखेथुखे याःगु अनुमान दु ।
थुलिमसि धेबाया भ्रष्टाचार जुलं नं प्रतिपक्ष दल, अख्तियार दुरुपयोग अनुसन्धान आयोग व नागरिक समाज सुम्क च्वनाच्वंगु खँय् मनूत अजू चायाच्वंगु दु । छुं लख धेबा जक उखेथुखे जूसां आकाश थ्वयेकीपिं मनूत, नेतात व नागरिक समाजया न्ह्यलुवाःत – थौं अर्बौंया भ्रष्टाचार जुलं नं सःतःगु मदु व लातां केरा स्वयेथें त्वाल्ल जक स्वयेगु ज्या यानाच्वंगु दु ।
अर्बौंया धेबा खल्ति तयां नं मगानाः वैद्य समूहया नेता कार्यकर्तातय्त आर्थिकरुपं नाकाबन्दीइ तयातःगु दु । बैद्य समूहया नेता कार्यकर्तातय्त द्यांलानाः पार्टीया ज्याय् लगय् जुयाच्वंगु दु । इमित धेबा छगःया नितिं नं सिसिकःकः जुइक पेले यायेगु ज्या यानाच्वंगु दु । तर क्रान्तिकारीत उकिं छत्ति नं निराश व विचलित जूगु मदु । क्रान्तियात न्ह्यःने यंकेत चां न्हिं लगय् जुयाच्वंगु दु निरन्तररुपं ।
थुगु कथंया अर्बौं धेबाया भ्रष्टाचारयात कयाः आयोगय् जनस्तरं दवाब वनेवं आयोगयात थुगु भ्रष्टाचारया मुद्दाया नितिं माःगु व मदयेक मगाःगु प्रमाण सबुत मालेत सक्रिय जुइत्यंगु दु । याकनं प्रमाणत ल्हातय् लायेवं – उगु अर्बौं धेबाया हिसाब किताब न्ह्यःने हयेमाली व धेबा हन्तां हे जूगु खःसा अख्तियारं थःगु प्रक्रियाय् वनीगु नं निश्चित प्राय खः ।

More Stories Like this