जनजाति महासंघपाखें १ गतेनिसें ३ गते तक नेपाल बन्दया घोषणा

येँ(झीगु स्वनिगः)

पहिचानया आधारय् राज्य पुनर्संरचना यायेमाःगु माग यानाः आन्दोलनय् क्वहां वयाच्वंपिं आदिवासी जनजातिय्त प्रहरीं हस्तक्षेप याःगु विरोधय् नेपाल आदिवासी जनजाति महासंघं वइगु जेठ १ गतेनिसें ३ गते तक नेपाल बन्द यायेगु घोषणा याःगु दु ।

पहिचानया आधारय् राज्य पुनर्संरचना यायेमाःगु नापं इलय् हे न्हूगु संविधान जारी ययोमाःगु माग यानाः म्हिगः मंगलवाः तराई बन्द याःगु इलय् प्रहरीं ब्यापक रुपं हस्तक्षेप याःगुया विरोध यानाः अथे नेपाल बन्दया घोषणा याःगु खः ।
तराई बन्दया झ्वलय् दर्जनौं जनजातिया कार्यकर्तायात प्रहरीं हस्तक्षेप यानाः घाःपाः यानाः ब्यूगु नापं ४७ म्ह नेता व कार्यकर्तातय्त तकं गिरफ्ता याःगु खः । गिरफ्तारय् लाःपिं जनजातिया नेता व कार्यकर्तातय्त विनासर्त रिहा यायेमाःगु नापं घाःपाः जूपिन्त वासः यायेमाःगु माग नं जनजाति महासंघं याःगु दु ।

अथे हे जनजाति महासंघं जेठ ५, ६ व ७ गते राष्ट्रिय राजनीतिक सम्मेलन यायेगु धकाः तकं घोषणा याःगु दु । जनजाति महासंघया नायः राजकुमार लेखीं आदिवासी जनजातिया मागयात बेवास्ता यानाः संविधानया मस्यौदा हयेगु व जेठ १४ गते संकटकाल लागू यानाः संविधानसभाया म्याद थप यायेगु दलया नेतातय्सं षडयन्त्र यानाच्वंगुलिं थप आन्दोलनया घोषणा यानागु खः धकाः जानकारी नं बियादीगु दु । थ्व हे दथुइ आदिवासी जनजाति संयुक्त संघर्ष समितिया ग्वसालय् वइगु बैशाख १४ गते येँय् केन्द्रीकृत कथं आदिवासी जनजातिय्सं शक्ति प्रदर्शन यायेत्यंगु दु ।