विप्लबया नेतृत्वय् जनपारिचालन ब्यूरोयात पूर्णता बिल

येँ(झीगु स्वनिगः)

एकीकृत नेकपा (माओवादी)या राष्ट्रिय कार्यकर्तातय्गु भेलां पार्टीया जनस्वयंसेवक परिचालन ब्यूरोयात पूर्णता ब्यूगु दु । माओवादीया मूछ्याञ्जे रामबहादुर थाप बादलं उलेज्या यानादीगु उगु राष्ट्रिय भेलां अथे ब्यूरो गठन याःगु खः ।

राष्ट्रिय भेलां ब्यूरोयात परिचालन यायेगु धकाः तकं निर्णय याःगु दु । माओवादी पार्टीं दत्या न्ह्यः हे पार्टीया स्थायी समितिया दुजः नेत्रविक्रम चन्दया नेतृत्वय् उगु ब्यूरो गठन याःगु जूसां पूर्णता मबियाच्वंगु अवस्थाय् म्हिगः मंगलवाः छगू भेलाया दथुइ उकियात पूर्णयता बिइगु ज्या जूगु खः ।

माओवादीया युवा नापं प्रभावशाली नेता नेत्रविक्रम चन्द विप्लब प्रमुख जुयादीगु उगु ब्यूरोय् संविधानसभाया राज्य पुनर्संरचना तथा राज्य शक्ति बाँडफाँट समितिं तयार याःगु १४ प्रदेशया प्रस्ताव कथं प्रत्येक प्रदेशया छम्ह÷छम्ह, अथे हे जनयुद्धय् घाःपाः जूपिं नापं दुथ्याका १७ म्हेसिया ब्यूरो गठन याःगु खः । उगु भेलाय् पुलांपिं लडाकुनिसें वाइसिएलया कार्यकर्तातय्सं तकं ब्वति काःगु दु धकाः सूत्रं धाःगु दु ।