विद्रोह यायेगु एमाले नेताया ख्याच्वः
येँ(झीगु स्वनिगः)
एमालेया पोलितब्युरो दुजः नापं सभासद् विजय सुब्बां लिम्बुवान राज्ययात थःगु पार्टीं समर्थन मयात धाःसा पार्टी दुने हे विद्रोह यानाः नेतातय्गु विरुद्ध संघर्ष यायेगु ख्याच्वः बियादीगु दु । म्हिगः मंगलवाः येँय् जूगु ज्याझ्वलय् वय्कलं धयादिल ‘१४ प्रदेशसिबें म्हो यायेत जिपिं तयार मदु । पार्टीया नायः झलनाथ खनाल, बरिष्ठ नेता माधवकुमार नेपाल, केपी ओलीं पार्टीया निर्णयया अःखः संघीयता विरुद्ध न्वंवानाच्वंगु दु । १४ प्रदेशसिबें म्हो लिम्बुवानयात मान्य जुइमखु ।
यदि अथे जुल धाःसा नेतृत्व बिरुद्ध वनेगु जुइ । लिम्वुवानत सुंक्क च्वनेगु जुइमखु । जिपिं जनविद्रोह यायेत तयार दु ।’ लिम्बुवान संघर्ष समितिया कजि तकं जुयादीम्ह वय्कलं लिम्बुवान मदुगु संविधान जारी यात धाःसा लिम्बुवानया सदरमुकामय् व मेमेगु थासय् च्याकेगु नाप. लिम्बुवानया प्रादेशिक व स्थानीय सरकार तकं गठन यायेगु जुइ धकाः ख्याच्वः बियादिल । सभासद् सुब्बां धयादिल ‘आः एमाले धकाः लिम्बुवानत मानेजुइ मखु । जिमित लिम्बुवान राज्य माः’ उगु संघर्ष समितिं लिम्बुवानया नितिं देय्न्यंकं हे अन्तक्र्रिया यायेगु, लिम्बुवान क्षेत्र धकाः सरकारी ज्याकू नापं गैर सरकारी ज्याकुथइ च्वंगु साइृनबोर्डय् तकं च्वकेगु व प्रचारात्मक आन्दोलन यायेगु तकं घोषणा याःगु दु ।
अथे हे मेमेगु दलया लिम्बुवानया नेताय्सं नं लिम्बुवान राज्यया नितिं आन्दोलन यायेगु धकाः ख्याच्वः बियाः वयाच्वंगु दुसा संघर्ष समितिइ प्रमुख दलत एकीकृत माओवादी व कांग्रेसया लिम्वुवान नेतात नं दुथ्यानाच्वंगु दु ।
