अय् जि यःम्ह
अनिक शाक्य
बिचाः यानाच्वना जि
एकान्त थासय्
लुल छ मनय्
दन्न निभाः त्वःथें,
छंगु लुमन्तिं
खिउँसे च्वंका भुनाच्वंगु
सुपाँच व सर्गतं
क्षितिज पाखे-
घुसुहुँ न्ह्यानावं थें ...,
अय् जि यःम्ह,
छंगु लुमन्तिं जक हे
दः आनन्द ब्यू,
सुभास ब्यू,
अले ब्यू दः,
स्वर्निम सुख ...,
छंगु व न्हिलाच्वंगु ख्वाः,
छंगु व यइपुगु मिखा,
छंगु व कोमल म्हुतुसि
अले व क्वमिलुगु पहः
हरे....! उकिया न्ह्यःने
जिगु साहित्य नं
नतमस्तक जुइ ...,
अय् जि यःम्ह,
छन्त खंसां निसें -
नुगः थातय् मलाः..,
छ गुलि बांलाः,
उलि बांमलाः
व सर्गःया तिमिला नं
छंगु लुमन्तिं
लुमुस्से च्वं चिकुला,
सिचुस्से च्वं हानं
व ताःन्वला नं ...,
अय् जि यःम्ह,
ऋतुया रानी खः छ,
मतिनाया खानी नं
छंगु रुप जक खंसा-
च्यः जुइ महादानी नं
खः छ हे जिगु-
मिखाया नानी नं
अले जिगु जिन्दगीया
कहानी नं.....,
अय् जि यःम्ह,
छ लिसे चाहिलाःगु
व घौपलख ई
लुयाच्वन झलझलि
थ्व मिखाय्,
छ हे जक
जि वँवं थाय्,
छ हे जक
जिगु च्वसाय्,
अले छ हे जक
जिगु हरेक कविताय् ... ।
Related Stories
नेपालभाषा साहित्य ख्यः जि कवि मखु मतिना जकं जूगु खः ला !! बुनाः मतिना जि थः हे ज्वी फुMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
