कम्युनिष्ट पार्टीया ६३ दँ

नेपालय् कम्युनिष्ट पार्टी पलिस्था जूगु ६३ दँ दुगु लसताय् एकीकृत नेकपा माओवादी, एमाले लगायत कम्युनिष्ट पार्टीतय्सं थीथी ज्याभ्mवः यानाः हंगु दु । २००६ साल बैशाख १० अर्थात अप्रिलया २२ तारिख सन् १९४९ खुन्हु नेपाल कम्युनिष्ट पार्टीया पलिस्था जूगु खः । नेता पुष्पलाल श्रेष्ठ लगायत प्यम्हय्स्यां नेपाल कम्युनिष्ट पाटीं स्वंगु खः । कम्युनिष्ट पार्टी स्थापना जूगु थौं खुइनिदँ फुनाः खुइस्वदँय् च्वन । यक्को कम्युनिष्ट पार्टीत अस्तित्वय् वलसा यक्कों कम्युनिष्ट पार्टीत एकीकृत नेकपा माओवादीइ दुहां नं वन । झिदँया जनयुद्ध ल्वानाः देशय् संघीयता, गणतन्त्र, धर्म निरपेक्षता राज्यया पुनर्संरचना, समावेशीयता लगायत आधारभूत एजेण्डात लागू जुल । देशय् तःधंगु हिउपाः वल । म्हिगः मनूतय्सं बिचाः हे मयाःगु ज्याखँत स्वयेखन ।
अथे खयां नं जनताया आधारभूत समस्यात ज्यंगु मदुनि व अग्रगामी शक्तिया रुपय् न्ह्यःनेवःगु देशया दकले तःधंगु पार्टी एकीकृत नेकपा माओवादीया संस्थापन पक्ष धयातःपिं प्रचण्ड–बाबुराम समूह अग्रगामी लँपुं त्वःताः फस्वयाः लिहांवन । देशय् तःधंगु हिउपाः हयेत ताःलाःगु शक्तिशाली माओवादी पार्टीयात सुधारवादीया लँपुइ यंकाः विस्तारवादी भारत व साम्राज्यवादी अमेरिकाया न्ह्यःने न त मस्तक जुयाः, इमिगु दलाली यानाः थःपिं सुरक्षाया कुसां कुयाः पार्टीयात विसर्जनया लुखाखँल्हुइ त्वःतेगु ज्या जुल । झिदँया जनयुद्ध ल्वानाः, १० औं हजारया बलिदानयात लोमंकाः प्रतिक्रान्तिया ध्वाँय् ल्होनेगु ज्या यात । प्रचण्ड–बाबुराम समूह ल्यं क्रान्तिया लँपुं लिहांवनाः क्रान्तिप्रति गद्दारी यात । क्रान्तिया ल्यं दायित्व क्वबुके मानिगु जनसेनायात नेपाली सेना छ्यलाः जनसेना, क्यान्टोन्मेन्ट व ल्वाभःयात सेनायात लःल्हानाः जनसेनायात बेइज्जती यात । थःगु असन्तोष प्वंकूपिं पूर्व लडाकुतय्त पुलिस छ्यलाः बुट व कत्थि नकाः अस्पतालय् भर्ना जुइत बाध्य यात । कांग्रेस व एमाले स्वयाः छपलाः न्ह्यःने वनाः देशघाती सहमति व सम्झौता याः जुल । शक्तिशाली पार्टी माओवादीयात पार्टीया निर्णय व पद्धतिया अःखः ज्याखँ यानाः विभाजन यानाबिल व कन्हय् वनाः मेगु हे सुधारवादी गैर कम्युनिष्ट पार्टी दयेकेत अभ्यास याः जुल ।

थौं संविधान सभाय् स्वब्वय् निब्व कम्युनिष्टतय्गु संख्या दुगु अवस्थाय् नापं कम्युनिष्ट व वामपन्थी विचारयात न्ह्यःने यंकाः अग्रगामी ज्याभ्mवःत लागू यानाः न्ह्यःने वनेगु पलेसा प्रतिगामी राजनीतिक विचारधारां वशिभूत जुयाः प्रचण्ड–बाबुरामपिंसं माओवादी पार्टीयात कमजोर यानाः संशोधनवादी नेपाली कांग्रेस व एमाले स्वयाः छपलाः न्ह्यःनेवनाः फाँसीवादीया अभ्यासय् कुहांवःगु दु । क्रान्तिकारीतय्गु छ्यों तछ्यानाः थःपिनिगु समूहयात प्रतिगामी समूह दथुइ थनेयंकाः तःधंगु गद्दारीया प्रमाण–सबुत बीत स्वयाच्वंगु दु । शान्ति व संविधानयात पूर्णता बीगु नामय् देशय् कम्युनिष्ट आन्दोलनया इतिहासयात हाकः किकेत स्वयाच्वंगु दु । आः कम्युनिष्ट पार्टीया ध्वाँय् न्ह्यःनेयंकेगु पलेसा विस्तारवादी भारत व साम्राज्यवादी अमेरिकाया खल्तिइ तयाबीत स्वयाच्वंगु दु । आः हाकनं न्हूगु इतिहास च्वयेमाःगु दु । म्हिगःया हिरो आः भिलेनया रुपय् च्वयेत बाध्य याकूगु दु ।

More Stories Like this