एकीकृत नेवाः राष्ट्रिय मोर्चाया न्हूधाः ज्या क्वचाल

येँ (झीगु स्वनिगः)

म्हिगः एकीकृत नेवाः राष्ट्रिय मुक्ति मोर्चा, नेपाःया न्हापांगु राष्ट्रिय भेला मोर्चाया मू ज्याकू कोपुण्डोलय् क्वचाःगु दु । भेलाया मूपाहां एकीकृत नेकपा माओवादीया वरिष्ठ न्वकु क.किरणं भेलाया सफलताया मनतुसें थौंकन्हय् पार्टीदुने जुयाच्वंगु गतिविधि न्ह्यःथनादिल । शान्ति प्रक्रियाय् वयेधुंकाः प्रचण्डं कार्यकर्ताया न्ह्यःने जनविद्रोहया खँ ल्हाइगु अले विपक्ष पार्टीया नेतातलिसे विशुद्ध शान्तिया खँल्हानाः अन्ततः पार्टी, जनता व देय्यात धोका ब्यूगु खँ कनादीगु दु ।

नेपाली जनताया हि, चःतिं जन्म जूगु, थम्हेस्यां हे बुइकूगु जनमुक्ति सेनायात कथित सेना समायोजन प्रक्रिया हे पूमवंकुसे हथासं जनमुक्ति सेना विघटन यायेत नेपाली सेना छ्यला कू यायेगु प्रस्ताव प्रचण्डं हे यात । क्रान्तिया नामय् लचकता यायां आत्मसमर्पण यायेगु ज्या जुल । क्रान्तिप्रति, देय् व जनताप्रति तःधंगु धोका व गद्दारी जुल । विगत व वर्तमानयात समीक्षा यानादिसें धयादिल – माक्र्सवादं हरेक चीजयात विश्वास व शंकाः यायेमाः धाइ । तर प्रचण्डया सवालय् माक्र्सवादयात ठिक ढंगं छ्यलेगु खँय् गल्ती कमजोरी जूगु आत्मस्वीकृति यानादीगु दु ।

प्रचण्डयात गुगु ढंगं विश्वास यायेगु ज्या जुल, तःधंम्ह नेता दयेकेगु जुल, थुकिं प्रचण्डं याःगु विश्वासघातयात पनेमपूmगु खँ न्ह्यःथनादिसें आः संविधान दयेकेगु सवालय् नं प्रचण्डपिं एमाले व कांग्रेसया हे लँपुइ न्ह्याःवनीगु सम्भावना अप्वयाः वंगु धयादिसें अथे जूगुलिं जनताया अधिकार पलिस्था यायेत म्हसीका व सामथ्र्यया आधारय् संविधान दयेकेत, नेवाः राज्य पलिस्था यायेत जनताया सशक्त आन्दोलनया आवश्यकता दु । राष्ट्रिय व वर्गीय आत्मसमर्पणया विरोधय् व नेवाः राज्य पलिस्था यायेत जूगु थुगु राष्ट्रिय भेलां सकल नेवाःतय्त सतकय् कुतहयेगु ज्याया नेतृत्व यायेफयेमाः धकाः मनंतुनादिल ।

अथेहे विशिष्ट पाहां नेवाः मोर्चाया केन्द्रीय ईञ्चार्जं निर्देशित संविधान जारी यायेगु तयारी जुयाच्वंगु धयादिसें भारतय् दयेकाःहःगु म्हसीकाया विरुद्धया संविधान जारी यायेत दलया नेतातय्सं कुतः यानाच्वंगु खँ धयादिल । नेवाः आन्दोलन व जनजाति आन्दोलन सशक्त ढंगं ल्ह्वने मफुत धाःसा प्रचण्डपिं नं एमाले, कांग्रेसया ल्यूल्यू वनेपूmगु खँय् सतर्क यानादिल । देशी विदेशी ग्रायण्ड डिजाइन कथं जेठ १४ दुने बिना म्हसीकाया संघीयताया संविधान घोषणा याकेगु, घोषणा याकेमफुत धाःसा संविधान सभा विघटन यानाः राष्ट्रपति शासन लागू याकेगु षड्यन्त्र नं जुयाच्वंगु खँय् सतर्क यानादिल ।
राष्ट्रिय भेलाय् ‘राष्ट्रिय व वर्गीय आत्मसमर्पणवादया भण्डाफोर यायेगु ! नेवाः स्वायत्त राज्यया पलिस्थाया नितिं संघर्ष यायेनु !!’ धइगु मू नारालिसे संक्षिप्त राजनैतिक प्रस्ताव मोर्चाया मूछ्याञ्जे क.पवनमान श्रेष्ठं न्ह्यःब्वयादीगु प्रस्तावयात सर्वसम्मतं पारित याःगु दु ।

राष्ट्रिय भेलां पुलांगु केन्द्रीय समिति विघटन यानाः १२५ म्ह दुजः दुगु केन्द्रीय समिति नीस्वंगु दु । नायलय् मोर्चाया संस्थापक पवनमान श्रेष्ठ, न्वकु बसन्त श्रेष्ठ, मोतिरत्न अमात्य, लक्ष्मी श्रेष्ठ, धनबहादुर महर्जन, मूछ्याञ्जे देवेन्द्र श्रेष्ठ, छ्याञ्जे सुरेश श्रेष्ठ, दिपेन्द्र श्रेष्ठ, राजकाजी महर्जन, दाँभरि शिव श्रेष्ठ व ल्यू दाँभरि मञ्जली शाक्ययात ल्यःगु दु । न्हापांगु राष्ट्रिय भेला उलेज्याया विशेष पाहां क. हितमान शाक्यं यानादीगु खःसा सभापतित्व क. बसन्त श्रेष्ठं यानादीगु खः । भेलाया सफलताया कामना यासें मगरप्रति मोर्चाया नायः सन्तोष बुढामगर, मोर्चाया सल्लाहकार लिसे प्राध्यापक डा. राममान श्रेष्ठ व महिला आयोगया पुलांम्ह नकिं नैनकला थापां भिंतुना न्वचु बियादीगु खः ।