सहमतिया नितिं तिब्र छलफल

पहिचानया आधारय् प्रदेश व संवैधानिक अदालत गठन जुइगु

येँ (झीगु स्वनिगः)

प्रमुख स्वंगू दल, एकीकृत नेकपा माओवादी, नेपाली कांग्रेस व एमाले लिसे संयुक्त लोकतान्त्रिक मधेशी मोर्चाया दथुइ छलफलय् तिब्रता ब्यूगु दु । म्हिगः सोमवाः सुथय् च्वंगु थुपिं प्यंगू दलया शीर्ष नेतातय्गु बैठक च्वनाः स्थगित लिपा न्हिनय् हाकनं च्वंगु खः । बैठकय् छु छु खँ जुल व छु गुलि सहमति जूगु धयागु खँ स्पष्ट मदुनिसां राज्यया पुनर्संरचना, शासकीय स्वरुप, निर्वाचन प्रणाली लगायत विषयलय् सहमति यायेत कुतः जुयाच्वंगु धाःगु दु ।

म्हिगः सोमवाः सुथय् च्वंगु बैठकं न्यादँ तक्कया नितिं संवैधानिक अदालत तयेगु खँय् सैद्धान्तिक रुपय् सहमति जुइधुंकूगु धाःगु दु । थुकियात कयाः न्यायालयय् ज्या यानाच्वंपिं न्यायाधीशतय्सं असन्तोष प्वंकूगु दु । थुकियात इमिसं शुरुंनिसें विरोध यानाः वयाच्वंगु खः । सर्वोच्च अदालतया प्रधान न्यायाधीशया नेतृत्वय् गठन याइगु उगु संवैधानिक अदालतयात केन्द्र दयेकाः अले प्रदेश प्रदेश दथुइ दनावइगु संवैधानिक विवादयात चीकेगु उद्देश्यं अख्तियारी नापं बीत्यंगु खः ।

अथेहे मां व बौ निम्हसिगु नामं नागरिकता बीगु खँय् नं सहमति जुइधुंकूगु दु । तर विदेशीया हकय् धाःसा छलफल जूगु तर सहमति जुइपूmगु मदुनि । छलफलय् ब्वति दुम्ह छम्ह शीर्ष नेताया धापूकथं उगु खँय् सहमति जुइगु सम्भावना म्हो हे जक दु । अथेहे निर्वाचन प्रणालीयात कयाः जूगु छलफल नं क्वचाइगु अवस्थाय् दु । मिश्रित निर्वाचन प्रणालीकथं ५०÷५० प्रतिशतया हाराहारीइ प्रत्यक्ष व समानुपातिकय् निर्वाचन प्रणालीइ वनीगु जूगु दु । निर्वाचन क्षेत्रयात विद्यमान २४० यात कायम यायेगु वा थुकियात म्हो यायेगु धयागु खँय् नं सहमति जुइपूmगु धाःसा मदुनि । शासकीय स्वरुपयात कयाः जूगु छलफल नं बांलाक हे वनाच्वंगु संकेत वःगु दु । शासकीय स्वरुपय् मिश्रित प्रणाली कथं प्रत्यक्ष निर्वाचित राष्ट्रपति व संसदं निर्वाचित प्रधानमन्त्री दथुइ कार्यकारी अधिकारयात कयाः बाँडफाँड यायेगु खँय् सहमतिलिक्क थ्यनेधुंकूगु दु ।
अथेहे पहिचानयात न्हापांगु प्राथमिकता बियाः पहिचान व सामथ्र्यया आधारय् प्रदेश दयेकेगु खँय् नं सहमति जुइत्यंगु दु । थ्वहे निगूया आधारय् राज्य पुनर्संरचना याइगु नं जूगु दु । थुकिया सीमांकन व नामांकन बारे धाःसा सहमति जुइपूmगु मदुनि । थ्व बाहेक मेमेगु विषयलय् धाःसा सामान्यरुपं छलफल जूसां खँ न्ह्यःने वंगु मदुनि व सहमति नं जुइगु अवस्था मदुनिगु धाःगु दु ।

सुथय् जूगु छलफल व सहमतिया खँय् उत्साहित जुयाः म्हिगः हे सःतूगु संविधानसभाया बैठक आपुलुखं स्थगित याःगु दु । छगू सुचं तिकाः बैठक स्थगित याःगु खः । थुया दथुइ थौंतक्कया दथुइ सहमतिया अन्तिम म्याद क्वछिनातःगु खःसां मेगु निन्हु ई थपय् यानाः सहमतिया लकस दयेकूगु दु । तर ल्यं विषयलय् गुलित सहमति यायेत ताःलाइगु खः व धाःसा स्वयेत छुं ई पीहे मालीगु जूगु दु ।