सरकारया औचित्य मन्त राष्ट्रिय सहमतिया सरकार दयेके मफेगु

वर्तमान सरकारय् मुख्यतः प्रचण्ड समूहया माओवादी व संयुक्त लोकतान्त्रिक मधेशी मोर्चा बाहेक मेमेगु दलया सहभागिता मदु । देय्या प्रमुख विषय वस्तु जुयाच्वंगु शान्ति व संविधानया नितिं न्ह्यःनेलाःथे सम्झौता व सहमति यानाः न्ह्याः वनाच्वंगु डा. बाबुराम भट्टराईया देशघाती व पार्टी निर्णय अले प्रक्रिया विपरित ज्याखँ यानाः आत्मसमर्पणया गालय् कुतुं वनेवं वर्तमान सरकारया औचित्य मदये धुंकूगु दु । सत्ताया नितिं न्ह्यात्थेंयाःगु निचतापूर्ण ज्या यानाः नं सत्ताय् च्वनेगु प्रचण्ड – बाबुरामपिनिगु चर्तिकला आः शंकास्पष्ट जक मखु, राष्ट्रिय सरकार स्वनेगु लँपुइ नं तःधंगु पंगः कथं न्ह्यःनेवंगु दु । गल्ति धुंकाः गल्तियात सुधार यायेगु पलेसा थप गल्ति यायेत उदृत वर्तमान सरकारं शान्ति प्रक्रियायात नं गलतरुपं सम्प्रेशन यानाबीवं न्यादँदुने जूगु कुतःत फुक्कं सितिं वंगु दु व सम्मानजनक सेना समायोजना खँ हवाई कल्पना जक साबित जूगु दु । प्रचण्ड–बाबुरामपिंसं जनसेनायात शत्रुता पूर्णव्यवहार यानाः समायोजनया नामय् नेपाली सेनाया आड भरोसाय् निशस्त्रीकरण व आत्मसमर्पण याकाः जनसेनायात पूर्णत विघटन यानाब्यूगु दु । थुगु सन्दर्भय् समायोजनया लँपु त्वःताः अनिवार्य अवकासय् अत्यधिक जनसेना कुहांवयेवं ६,५०० या प्रचण्ड–बाबुरामपिनिगु अनुमानं हावा नःगु दु । स्वद्वःया संख्या जक समायोजनय् वनीगु धयागु छगू कथं प्रचण्ड – बाबुरामपिनिगु जनसेनाया अविश्वास खः, असन्तोष खः । जनसेनाया मिखां वय्कःपिं निम्हं कुतुं वनेधुंकूगु दु । आः हानं जनसेनाया नां कायेगु धयागु नं नैतिक अपराध यायेगु खः ।

वर्तमान बाबुरामया सरकार देशय् फुक्क थासय् असफल जुइधुंकूगु दु । देय्या हरेक कुं कुंचाय् वर्तमान सरकारप्रति आक्रोश दु, असन्तोष दु । तर सरकारय् विराजमान प्रचण्ड–बाबुराम समूहया मन्त्रीत व मोर्चाया मन्त्रीतय्सं थुकियात थुयकाः राष्ट्रिय सहमतिया सरकार दयेकेत लँ चायेकाः बीगु पलेसा – सरकार मत्वःतेगु बरु थुगु सरकारय् हे दलतय्त दुथ्याकुकुं सहमतिया सरकार दयेकेगु धुनय् लगय् जूगु दु । व वर्तमान सरकारं हे जेठ १४ गते न्ह्यः संविधान पिकायेगु धाःगु दु । वंगु शनिवाः प्रधानमन्त्री बाबुरामया प्रधानमन्त्री छेँय् च्वंगु बैठकं उगु कथंया निर्णय याःगु खः । उखे नेपाली कांग्रेस व एमालें न्हापा हे बाबुरामया सरकारय् दुहांमवनीगु खँ स्पष्ट यानातयेधुंकूगु खःसा, नेपाली कांग्रेसं थःगु नेतृत्वय् सरकार दयेकेगु खँय् दाबी यानाच्वंगु दु । संविधान नं थःगु सरकारं घोषणा याकेगु धयावयाच्वंगु दु ।

सरकारय् दुथ्याःपिं व प्रतिपक्षय् च्वनाच्वंपिं थःथःगु हे थासय् मस्त दुगुलिं आः याकनं छुं नं हालतय् सहमतिया सरकार दयेकेगु अवस्था मदु । कांग्रेसं एमालेया ग्वाहालि कयाः थःगु नेतृत्वय् सरकार दयेकेगु दावा यानाः वयाच्वंगुया ल्यूने ठोस आधार मदुसां, सरकारय् सहभागी दल व नेतातय्सं सरकारय् कांग्रेस व एमालेयात दुथ्याकेगु धयावयाच्वंथें – दुहां वइगु सम्भावना खनेमदु । थुकिं यानाः राष्ट्रिय सहमतिया सरकार दयेके मपैmगु हे खनेदु । बाबुराम भट्टराईं राजीनामा बियाः लँ चायेकाः मबीकं सरकार परिवर्तन जुइख्वाः मवः । तर छता खँ छु धाःसा पक्का डा. बाबुरामया नेतृत्वया सरकार चिलामबीकं न्हूगु सरकार सम्भव मदु । लिसें वर्तमान सरकारं चिचीधंगु दलयात सरकारय् दुथ्याकाः हे हिउपाः हःसां नं ततःधंगु दलया बहिष्कार जुया हे च्वनी व राष्ट्रिय सहमतिया सरकारया खँ नं साकार रुप काइगु खनेमदु ।

More Stories Like this