शक्ति प्रदर्शन याइगु १४ गते छु छु जुइ ?

येँ (झीगु स्वनिगः)

आदिवासी जनजाति संयुक्त संघर्ष समितिया ग्वसालय् वइगु बैशाख १४ गते येँय् केन्द्रीकृत कथं आदिवासी जनजातिय्सं शक्ति प्रदर्शन यायेत्यंगु दु । पहिचानया आधारय् राज्य पुनर्संरचनाया नितिं अथे शक्ति प्रदर्शन यायेत्यंगु खः । शक्ति प्रर्दशनया झ्वलय् जनजातितय्सं बैशाख १४ गते बसन्तपुरया महाद्यःपार्वती दबू १ बजेनिसें २ बजे तक सांस्कृतिक ब्वज्या याइ ।

जाति भाषाया आन्दोलनय् तिबः जुइगु कथंया उगु सांस्कृतिक ब्वज्याय् नेवाः, तामाङ, शेर्पा व थारुतपाखें सांस्कृतिक ब्वज्या याइ । अनंलिपा २ बजेनिसें जनसभा याइ । उगु जनसभाय् ब्वति कायेत नेपाल आदिवासी जनजाति महासंघं सांस्कृतिक झाही सहितया जुलुस भृकुतिमण्डप लागां पिकाइगु, तामाङतय्सं पुतलिसतक लागां, मगःतसें कालमाति लागां, शेर्पा व भोतेतय्सं चाबहि लागां, राई व लिम्बुत कोटेश्वर लागां, थारुत प्रदर्शनिमार्ग लागां जुलुस पिकाइ धाःगु दु ।

नेवाःत तप्यंक हे बसन्तपुरय् वनेगु नापं जनजातितय्त लसकुस यायेगु व जनसभाया तयारी यायेगु भाला बियातःगु दु । सभाय् आदिवासी जनजाति नापं मधेसी नेतातय्सं तकं न्वंवानादी धाःगु दु । उकिया तयारीया झ्वलय् बैशाख १३ गते १ बजे भृकुतिमण्डप लागां मोटरसाइकल र्‍याली पिकायेगु । उगु जुलुस न्यूरोडय् थ्यनेवं नेवाःतय्सं कोणसभा यायेगु, बौद्धय् थ्यनेवं तामाङतय्सं अथे हे चाबहि लागाय् थ्यनेवं शेर्पातय्सं क्वनसभा याइगु अथे हे नेपाल आदिवासी जनजाति महासंघं बैशाख ११ गते देय्न्यंकं मसाल जुलुस पिकाइगु जूगु दु । सनिलय् ५ ताः इलय् रत्नपार्क लागाय् मुनाः मसाल जुलुस पिकाइगु जुइ धकाः जनजाति महासंघं धाःगु दु ।

थुगुसी आन्दोलनया ज्याझ्वः घोषणा याःगु आदिवासी जनजाति संयुक्त संघर्ष समितिइ जनजाति महासंघ, नेवाः स्वायत्त राज्य मंकाः संघर्ष समिति, नापं थीथी जातीय संगठनंनिसें आदिवासी जनजाति सभासद्तय्गु दबाव समूह ककस तकं दुथ्यानाच्वंगु दु ।