‘जातीय पहिचानया आधारय् राज्य पुनर्संरचना मजूसा ल्वाभः ल्ह्वने’

येँ (झीगु स्वनिगः)

नेपाःया आदिवासी जनजातिय्गु मंकाःगु संगठन नेपाल आदिवासी जनजाति महासंघया मूछ्याञ्जे आङकाजी शेर्पां जातीय पहिचानया आधारय् राज्य पुनर्संरचना मजुल धाःसा सशस्त्र युद्ध यायेगु ख्याच्वः बियादीगु दु । वय्कलं आदिवासी जनजातिय्गु मागयात सम्वोधन मजुल धाःसा प्रमुख स्वंगू दलया शीर्ष नेतात ज्ञानेन्द्रया हालत जुइ धकाः ख्याच्वः नं बियादीगु दु ।

सोलखुम्बुइ पत्रकारतय्सं याःगु साक्षत्कार ज्याझ्वलय् न्वंवासें जनजाति महासंघया मूछ्याञ्जे शेर्पां अथे ख्याच्वः बियादीगु खः । वय्कलं जातीय आधारय् प्रदेशत निर्माण यायेगु व माःगु कथंया अधिकार मबिल धाःसा जनजातित सशस्त्र संघर्षय् क्वहां वेत बाध्य जुइ धकाः धायादिसें जेठ १४ गतेया दुने संघीयता सहितया संविधान जारी मयात धाःसा स्वंगू दलया शीर्ष नेतातय्गु हालत ज्ञानेन्द्रयाथें यानाबिइ धकाः नं धयादिल ।
वय्कलं धयादिल ‘जनजाति महासंघ स्वंगू दल धुंकाः दक्ले तःधंगु जनमास जूगु संगठन खः । जिमिके डेढ करोड आदिवासी जनजातित दु । जिमिसं धयागु थें मजुल धाःसा नेतातय्गु हालत ज्ञानेन्द्रयासिबें नं बांमलाःगु जुइ । जातीय पहिचानविनाया संविधान घोषणा यायेगु म्हगस तकं मखंसां जिउ ।’ जातीय पहिचानया आधारय् राज्य पुनर्संरचना मयासें संविधान जारी यात धाःसा एक सेकेण्ड तकं सुंक च्वनेगु जुइमखु अबले हे च्याकेगु जुइ धयादिसें अज्वःगु अवस्थाय् आदिवासीतय्सं ब्यागलं्र कथंया पार्टी चायेका समाननन्तर सरकार दयेकेगु जुइ धकाः तकं धयादिल ।

थःपिं न्ह्याथेंजाःगु बलिदान यायेत नं तयार दु धयादिसें शेर्पां नेपालय् यक्व हे जातीत दुसां नं थःगु हे जन्मभूमि कथं नालाः वयाच्वंपिं ११ गू जक जती दुगुलिं ११ गू जाततियात जक जातीय पहिचानया आधारय् प्रदेशत बिइवं गाः धकाः स्पष्ट यानादीगु दु ।