सहमति मजूसा संविधानसभाय् मतदान यायेमाःगु बाध्यता

न्हिनसंनिसें चान्हय् तकं वार्ता

येँ (झीगु स्वनिगः)

अन्तिम इलय् वयाः चान्हय् जक सहमति यानाः वयाच्वंपिं प्रमुख दलया शीर्ष नेतात न्हूगु संविधान निर्माणया नितिं नं वंगु चान्हय् लिबाक्क तक वार्ताय् च्वंगु दु ।
म्हिगः आइतवाः सुथंनिसें तःक्वःमछि हे न्हिनय् लगातार मुँज्या च्वंगु जूसां सहमति ब्वलंके मफयाः चान्हय् तक हे वार्ता जुयाच्वंगु खः ।

म्हिगः आइतवाः सुथय् दलतय्गु दथुइ सहमति मजूगुलिं संविधानसभाया संवैधानिक समिति अन्तर्गत विवाद समाधान उपसमितिया बैठक तकं स्थगित जूगु खः । चान्हय् तकया दुने नं सहमति मजुल धाःसा थौं सोमवाः बैशाख ११ गतेनिसें संविधानसभाय् मतदानया आधारय् विवादित विषय निर्णय यायेमाःगु जुयाः अथे प्रमुख स्वंगू दल व मधेसी मोर्चाया शीर्ष नेतातय्गु दथुइ वार्ता जूगु खः । न्हूबानेश्वरया संविधानसभाया भवनय् म्हिगः आइतवाः सुथय् पौन ९ बजेनिसें वार्ता जूगु खः तर वार्ता निष्कर्षविहिन जूगु खः । अनं लिपा नेतात एकीकृत माओवादी व एमालेया नेतात कम्युनिष्ट पार्टीया स्थापना दिवसया लसताय् व्यस्त जुइमाःगु जुयाः बहनी हाकनं ५ बजेलिपा शीर्ष नेतातय्गु वार्ता जूगु खः । अन हे लन्चया व्यवस्था यानाः जूगु उगु वार्ता चान्हय् ११ बजे तक न्ह्याइ धकाः कांग्रेसया नेता रामचन्द्र पौडेलं संचारकःमितय्त जानकारी बियादीगु दु । अथे हे एकीकृत माओवादीया नायः पुष्पकमल दाहाल प्रचण्डं थौं सोमवाः सुथय् तकया दुने सहमति यायेगु नितिं कुतः जुयाच्वंगु दु धकाः नं धयादीगु खः । वय्कलं दलत सहमति लिक्क थ्यने धुंकूगु दावी तकं यानादीगु खः । म्हिगःनिसें हे प्रमुख दलतय्गु दथुइ एकपक्षीय, द्धिपक्षीय कथं वार्ता यायेगु नाप नापं पुचः पुचः च्वनाः तकं सहलह ब्याकेगु ज्या तिब्र रुपं न्ह्याकाः वयाच्वंगु खः ।

प्रमुख स्वंगू दल व मधेसी मोर्चाया शीर्ष नेतातय्सं कि सहमतिया नितिं चान्हय् हे हाकनं म्याद थप यायेमाःगु अवस्था दु मदुसा चान्हय् तकया दुने नं सहमति मजुल धाःसा थौं सोमवाः संविधानसभाय् बहुमतया आधारय् विवादित विषययात कयाः निर्णय यानाः संविधानया मस्यौदा दयेकेमाःगु बाध्यकारी अवस्था दु । लिपांगु इलय् सहमतिया म्याद न्यान्हु थप याःगु अले उगु ईया दुने सहमति मजुल धाःसा संविधानसभाय् मतदानया आधारय् निर्णय यायेगु धकाः नेतातय् दथुइ सहमति जूगु खः । उकिं दलत यःसां मयःसां संवैधानिक प्रक्रिया कथं संविधानसभाय् मतदानय् हे वने मालीगु अवस्था ब्वलंगु दु । उकिया निर्णय थौं सोमवाः सुथय् तकया दुने वइगु अवस्था दुसां दलया नेतातय्सं संविधानसभाय् मतदान जुइ न्ह्यः तक थौं न्हिच्छि नं वार्ता व बैठक याइगु अवस्था दु । वार्ताय् एकीकृत माओवादीया नायः प्रचण्ड, प्रधानमन्त्री डा. बाबुराम भट्टराई, कांग्रेसया सभापति सुशील कोइराला, एमालेया नायः झलनाथ खनाल, मधेसी मोर्चाया विजय गच्छेदार लगायतया नेतात व्यस्त जुयादीगु खः ।