एपीएफयात बुकूसें थ्रीस्टार क्लब सेमीफाइनलय्

थ्रीस्टार क्लब येँय् न्ह्यानाच्वंगु ब्रिटिस गोर्खा कप फुटबलया सेमीफाइनलय् दुहांवंगु दु ।

त्रिपुरेश्वरय् च्वंगु दशरथ रंगशालाय् शनिवाः जूगु न्हापांगु क्वाटरफाइनल कासाय् सशस्त्र प्रहरी एपीएफ क्लबयात छगूया विरुद्ध प्यंगू गोलं बुकूसें डिफेण्डिङ्ग च्याम्पियन थ्रीस्टार लिपांगु प्यंगुली थःगु थाय् पक्का याःगु खः ।

कासाया स्वीगू मिनेटय् एपीएफ क्लबया लागि राजेन्द्र रावलं गोल यानाः न्हयःने लाकूगु खः । न्हापांगु हाफय् छगू गोलं न्ह्यःने लाःगु एपीएफ निगूगु हाफय् स्वंगू गोल नयाः शनिवाःया कासापाखें पिहांवनेमाःगु खः । थ्रीस्टारया लागि न्हयेछगू मिनेटय् सन्तोष साहुखलः नं गोलयानाः कासा बराबरी हःगु खःसा उकिया निगू मिनेट लिपा हे सन्तोषं हे पेनाल्टीपाखें गोल यानाः थ्रीस्टार छगू गोलं न्ह्यःने लात । कासाया न्हय्स्वंगू मिनेटय् सन्तोषयात एपीएफया कृष्ण लामां क्वथलेवं ह्याउँगु कार्डया लिसें कासां पिहांवंगु खःसा थ्रीस्टारयात पेनाल्टीया ह्वःताः वःगु खः ।

झिम्ह कासामी सीमित जुइवं दबाबय् लाःगु एपीएफं थ्रीस्टारया विशन गौचनपाखें चय्छगू मिनेटय् मेगू गोल नयेमाल । निगू गोलं न्ह्यःने लाःगु थ्रीस्टारया लागि चय्गुंगू मिनेटय् बिक्रम लामां गोल यासे कासा छगूया विरुद्ध प्यंगू गोलं त्याकेत ताःलाःगु खः ।

थुगु कासा अन्तरगत कन्हय् निगू विभागीय टीम आर्मी क्लब व नेपाल पुलिस क्लब दथुइ सेमीफाइनलया लागि धेंधेंबल्ला याइ ।

More Stories Like this