बीरगंज यु १९ क्रिकेटया फाइनलय्

क्षेत्र नं. २ बीरगंज यु-१९ राष्ट्रिय क्रिकेट कासाय फाइनलय् थ्यंगु दु । मंगलवाः जूगु कासाय् क्षेत्र नं. १ विराटनगरयात ७ विकेटं बुकाः बीरगंज समूह चरणया फुक्क कासा त्याकूसें खुगु ल्याः कयाः फाइनलय् दुहांवंगु खः ।

विराटनगरं न्ह्यब्वःगु २१४ रनया लक्ष वीरगंजं ४५.४ ओभरय् ३ विकेटया क्षतिइ पूवंकल । कासाय् म्यान अफ द म्याच घोषित जूम्ह विजय घलानं अविजित ७२ रनया योगदान बिउगु खःसा हसिम अन्सारीं ४९ रन दयेकूगु खः ।

त्रिवि क्रिकेट कासाख्यलय् न्हापां ब्याटीङ्ग याःगु विराटनगरं ५० ओभरय् च्यागू विकेटया क्षती २१३ रन दयेकूगु खः । कासाय् विराटनगरया लागि सिद्धान्त लोहनीं ५२ रन दयेकल ।

अथेहे थौं हे जूगु मेगू कासाय् क्षेत्र नं. ३ येँ नं क्षेत्र नं. ८ पोखरायात प्यंगू विकेटं बुकल । न्हापा ब्याटिङ्ग याःगु पोखरां ४३.४ ओभरय् फुक्क विकेट तंकूसें सच्छि व स्वीन्हय्गू रन दयेकूगु खःसा लिसलय् येँ नं २९.१ ओभरय् खुगू विकेटया क्षती लक्ष पूवंकूगु खः ।

More Stories Like this