न्यूरोड टिमयात बुकूसें फ्रेण्डस् क्वाटरफाइनलय्

फ्रेण्डस् क्लब येँय् न्ह्यानाच्वंगु ब्रिटिस गोर्खा कप फुटबलया क्वाटरफाइनलय् दुहांवंगु दु । येँया दशरथ रंगशालाय् मंगलवाः जूगु कासाय् न्यूरोड टिम (एनआरटी)यात छगूया विरुद्ध निगू गोलं बुकूसें फ्रेण्डस् क्लबं लिपांगु च्यागुली थःगु थाय् पक्का याःगु खः ।

कासाया १८गू मिनेटय् लक्की कार्कीया गोलपाखें न्ह्यःने लाःगु फ्रेण्डस् क्लबया लागिं ४१गू मिनेटय् प्रकाश बुढाथोकिं मेगू गोल याःगु खः । कासाया ४८ गू मिनेटय् एनआरटीया लागि सुशील केसीं गोल यानाः कासाय् लिहांवयेगु कुतः याःगु खःसां नं बुइगुपाखें धाःसा बचे यायेमफुत ।

कासाया लिपांगु मिनेटय् निगुलिं टिमया छम्ह-छम्ह कासामितय्सं ह्याउँगु कार्ड नयेवं कासा झिम्ह-झिम्ह कासामिइ सीमित जूवंगु खः ।

More Stories Like this