थौं विश्व वातावरण दिवसया झ्वलय्

झीगु थाय् झीगु बाय्या रक्षा याये

- सारासा

-"लँ हे मदये धुंकल मनूत जुइ हे मजीधुंकल ।"
-"लँ हे चिब्या जुइधुंकल न्ह्याबलें ट्राफिक जाम जुइधुंकल ।"
-"लः हे मगाय् धुंकल न्ह्याबलें धाराय् लः मवयेधुंकल ।"
-"धः हे चीगः जुइधुंकल न्ह्याबलें धः जाम जुइधुंकल ।"
-"सरकार हे मजीधुंकल न्ह्याबलें फोहोर द्वँचिने धुंकल ।"
-"जुइ हे मजिइधुंकल सासः हह पनेधुंकल ।"
-"न्यने हे मजीधुंकल मोटरया सः जक जुइधुंकल ।"

लँय् वँवं छेँय् च्वँच्वं नेवाःत थथे हाला च्वनी । टि.भी. स्वःसां थ्व हे खँ ल्ह्वनाच्वनी । एफएम न्यंसां थ्वहे खँ वयाच्वनी । पत्रपत्रिका स्वःसां थ्व हे खँ च्वया तइ । सकसियां म्हुतुइ लँ मगायेधुंकल लः मगायेधुंकल धः मगायेधुंकल आदि आदि धयाच्वनी । तर स्वनिगलय् मनूत अप्वः जुल । मनूतय्गु चाप म्हो यायेमाल धकाः न त नेवाःतय्सं धाये सः न त टि।भी। एफएम चले याईपंसं हे धाये सः न त पत्रिका पिकाईपंसं हे च्वये सः ।

टि।भी। एफएम व पत्रिका पिकाईपं अप्वः नेवाः मखुपिं लानाच्वनी । उमित स्वनिगलय् मनूत अप्वः जुल धयागु चिउताः दइ मखु । उकिसनं उपिं स्वनिगलं पिनेयापिं अनेवाः जुयाच्वनी । उमिसं थन मनू अप्वः जुल धाये सइ मखु धाये सःसां धाये यइ मखु । उमिसं राजधानीइ थथे हे मनूत अप्वः जुइ धकाः तर्क पिकयाच्वनी । छाय्कि उपिं हे थन च्वंपिं मखु । उमि थन नेवाःतय्गु जग्गा न्यानाः छेँ छखा दनेमानि । छेँ दनेधुंकूपिं जूसां मनूतय्गु चाप कम यायेमाल धायेबलय् थन च्वंपिं नेवाःतय्सं न्ह्यलं चाल कि कन्हय् थःपिं याउँक द्यने फइ मखु धयागु उमि धन्दा दु । उकिं उमिसं थन मनूत अप्वः जुल धाइ मखु बरु लँ तब्या यायेमाल धाइ धः तःगः याये माल धाइ उपयुक्त थासय् बजार व्यवस्था याये माल धाइ । थथे लँ तब्या यात धाःसा लँया जःखः च्वंगु छेँ थुने दइ बजारया व्यवस्था यायेबलय् नेवाःतय्गु बुँ अधिग्रहण याये दइ । थथे लँ तब्या यात कि थन च्वंपिं नेवाःतय्गु छेँ थुने दइ उमिगु छेँ थुन कि उपिं थनं पिहां वनी । उपिं थनं पिहां वनेवं थन नेवाःत कम जुइ । गुलि नेवाःतय्त थनं पितना छ्वये फइ उलि हे पिने जिल्लां थन च्वं वयाच्वंपिनि याउँक न्ह्यः वयेके दइ । थज्याःगु विचारं अनेवाः सरकारी अधिकारीतय्सं गथे याःसा थन च्वंपिं आदिवासी नेवाःत थनं पितिना छ्वयेफइ धकाः गट्टी चले यानाच्वनी । थुकिया छगू क्वाःक्वाःगु दसि निगूगु रिङ्गरोड दयेकेगु व थौंकन्हय् हयेत्यंगु शहरी विकास विधेयक नं खः धकाः मधासें मगाः । थुकी नेवाःतय्सं क्वात्तुक विरोध यानाः उकियात खारेज याके मफुत धाःसा ल्यं दुगु नेवाःतय्गु बुँ नं स्वाहाः जुयाः अनेवाःतय्सं 'आहा !' याइगु बांलाक सीदयेधुंकल ।

थन थपाय्हाकःगु भूमिका च्वयागु कारण छता हे जक दु नेवाःतय्सं थःपिनिगु थाय् थःपिनिगु बाय् धाये मसये धुंकल । उमिसं न्हाय्प्वाः तिना जुइ माःसां न्हाय्पंप्वाः तिना जुइ माःसां थन मनूत अप्वः जुया धः जाम जुल धाये मसः थन जिल्लायापिं मनूत अप्वः दुहां वःगुलिं ट्राफिक जाम जुल धाये मसः पिनेयािपं गुण्डात अप्वः दुहां वःगुलिं थनया शान्ति सुरक्षा भंग जुल धाये मसः । जिल्लायापिं थन दुहां वयेके मजिल धाये मसः । बरु उिपं त्वाःत्वालय् छेँय् छेँय् अनेवाः हावी जुयाच्वंगु पार्टीया चिन्ता कयाच्वनी थःपिनिगु थाय् बाय्या चिन्ता काइ मखु ।

थौं वातावरण दिवस कुन्हु नेवाःतय्सं थज्याःगु खँया चिउता कयाः थःपिनिगु थाय् बाय्या रक्षा यायेगु सोच दयेकेगु हे कन्हय्या झीगु वातावरण रक्षा यायेगुया न्हापांगु पलाः जुइ । उकिं झीसं थौं हे झीगु थाय् झीगु बाय् झीगु बुँ झीगु ख्यः झीगु आकाशया रक्षा याये सयेके ।

More Stories Like this