फोरमं समर्थत लित काइगु
सरकार विस्तार लिपा झन हे विवाद
येँ / (सन्ध्या टाइम्स) पार्टीयाके अनुमति मकासे प्रधानमन्त्री माधव नेपालया सरकारयात समर्थन याःगुलिं मधेशी जनअधिकार फोरम दुने ल्वापु पिहां वःगु दुसा फोरमया संस्थापन पक्षं सरकारयात बियातःगु समर्थन लित कायेगु घोषणा याःगु दु ।
फोरम अध्यक्ष उपेन्द्र यादव व सह अध्यक्ष जेपी गुप्तां थौं छगू पत्रकार सम्मेलन यासें थःपिंसं सरकारयात बियातःगु समर्थन लित कायेगु धकाः घोषणा यायेत्यंगु दु । पार्टीया निर्णय मदुसां नं माधव नेपालया सरकारय् वंम्ह वरिष्ठ नेता विजय गच्छदारयात पार्टीं निष्काशन यायेगु खँ गुप्तां धाःगु दु । छुं जुयाः गच्छदार पार्टीं निष्काशित जुल धाःसा फोरम थिनंनिसें हे विधिवत् रुपं विभाजित जू वनी । व फोरम विभाजित जुल धाःसा सरकारयात बहुमत खाकेत थाकुइगु सम्भावना दु ।
नेता गुप्तां साचार माध्यमत लिसे खँ ल्हासें फोरम अनौपचारिक रुपं विभाजन हे जुइधुंकूगु बिचाः नं प्वंकादीगु दु । फोरमं थःगु पार्टी कुचा जुइत्यंगुया दोष धाःसा एमालेयात बिउगु दु । एमालें थःगु पार्टीइ हस्तक्षेप यानाः पार्टी विभाजन याःगु द्वपं फोरम नेतातय्सं बिउगु खः ।
एमालेय् नं कचवं
उखे सरकारय् वनीपिं मन्त्रीतय् नांधलः तयार यायेगु खँयात कयाः एमाले दुने नं विवाद तच्वया वंगु दु । म्हिगः च्वंगु स्थायी समितिया बैठकय् प्रधानमन्त्री नेपाल व पार्टी अध्यक्ष झलनाथ खनालपाखें अलग अलग हे धलः न्ह्यःने तयेवं विवाद तच्वयावंगु खः । उकी खनालं फुक्क छगू हे जातियापिं जक मन्त्री जू वनेगु पाय्छि जुइ मखु धासें क्षेत्र व जातीय समीकरण मिले यानाः धलः दयेकूगु खःसा प्रम नेपालं रघुवीर महासेठ छम्ह बाहेक फुक्कं छगू हे जातियापिं जक दुगु धलः दयेकूगु खः । थुकी विवाद जुयाः अध्यक्ष खनालं तमं दथुइ हे बैठक स्थगित यानादीगु खः।
सूत्रं बिउगु जानकारी कथं आः एमालें अध्यक्षया धलखं निम्ह व प्रधानमन्त्रीया धलखं निम्ह कयाः प्यम्हेसित मन्त्री दयेकेगु सहमति कायम याःगु दु ।
प्रधानमन्त्री माधव नेपालं म्हिगः बहनी याकनं याकनं अतिकं 'गाइजात्रा' पहलं मन्त्रिमण्डल विस्तार याःसां मन्त्रीतय् मन्त्रालय विभाजन धाःसा आः तकं याये मफुनि । थुकिं यानाः मन्त्रीतय्सं सपथ ग्रहण हे यायेधुंकूसां नं सरकारं ज्या याये फइगु अवस्था धाःसा मदुनि ।
गच्छदारयात अप्पा
पार्टीयाके मन्यँसे सरकारय् सहभागी जूवंम्ह मधेशी जनअधिकार फोरमया नेता एवं उपप्रम विजय गच्छदारयात थौं थः हे कार्यकर्तातय्सं अप्पां कयेकल । सुथय् पार्टी ज्याकू शंखमुलय् वनाच्वंगु इलय् छुं कार्यकर्तातय्सं वय्कःया गाडीइ अप्पां कयेका हःगु खः ।
