'माओवादी-मधेसी आक्रमक जुइगु'

पहिचान सहितया प्रदेश दयेकेगु खँय् सहमति

येँ (झीगु स्वनिगः)

एकीकृत नेकपा (माओवादी) व मधेसवादी दलतय्गु मंकाःगु मोर्चा संयुक्त लोकतान्त्रिक मधेसी मोर्चा आः न्हूगु संविधानया नितिं नापं जानाः आक्रमक रुपय् न्ह्याः वनीगु अवस्था वःगु दु । पहिचानया आधारय् राज्यया पुनर्संरचना यायेमाःगु विषययात कयाः माओवादी व मधेसी मोर्चा आः आक्रमक रुपं न्ह्याः वनेत्यंगु खः ।

माओवादी लडाकु व हतियार सेनायात जिम्मा बिइ धुंकाः लगभग शान्ति प्रकृयाया महत्वपूर्णया ज्या क्वचाःगु निष्कर्ष पिकासें अथे संविधान दयेकेगु मुद्दाय् छगू हे मत दयेकाः वनेगु खँय् सहमति जूगु खः । संघीयता, न्यायप्रणाली, राज्यया शासकीय स्वरुप नापं मेमेगु मुद्दाय् छगू हे धारणा दयेकाः वनेगु नितिं सहलह तकं जूगु दु ।
मधेसी मोर्चाय् दुथ्याःगु मधेसी जनअधिकार फोरम गणतान्त्रिकया कार्यवाहक नायः राजकिशोर यादवं संचारकःमितलिसे खँल्हासें धयादिल ‘म्हिगः तक जिपिं रक्षात्मक अवस्था खः । माओवादी हतियार विहिन नागरिक पार्टी जूगु दु ।

आः जिमिगु गठबन्धन मजबुद जूगु दु । जिपिं आः आक्रमक रुपं न्ह्याः वनेगु जुइ ।’ म्हिगः शनिवाः माओवादी व मधेसी मोर्चाया शीर्ष नेतातय्गु दथुइ बालुवाटारय् च्वंगु मुँज्या लिपा वय्कलं लडाकु व हतियार सेनायात लःल्हाये धुंकाः माओवादी नागरिक पार्टीइ रुपान्तरण जुइ धुंकूगु मुद्दाया सवालय् आः सहकार्य यानाः वनेत अझ अःपुल अथ ेजानकारी बियादीगु खः ।

इमि दथुइ पहिचानसहितया संघीयता, संवैधानिक अदालत गठन, राष्ट्रपति व प्रधानमन्त्रीया दथुइ कार्यकारी अधिकार इनाः कायेगु मिश्रीत निर्वाचण प्रणाली व शासन प्रणालीयात कयाः नापं वनेत सहमत जूगु खः । तर संघीय प्रदेशया ल्याः व मधेसी मोर्चां माग यानाः वयाच्वंगु फुक्क मधेस छगू प्रदेशया बारे अझ नं सहलह यायेगु ल्यंदनि धकाः धयादिसें मधेसी मोर्चाया नेता यादवं धयादिल ‘पहिचानसहितया संघीयताय् वनेगु प्रष्ट सहमति जूगु दु । प्रदेशया ल्याः नापं मेमेगु खँय् सहलह यायेगु ल्यं दनि ।’

थ्व हे दथुइ माओवादी व मधेसी मोर्चा पहिचानया आधारय् राज्य पुनर्संरचनाया सवालय् छगू हे मत जुयाः वनीगु अवस्था ब्वलनेवं आः आदिवासी जनजाति सभासद्तय्गु दबाव समूह ककस नं नापं वनीगु संभावना अप्वयाः वःगु दु । संविधानसभाय् माओवादी, मधेसी व ककस छगू हे मत जुयाः च्वन धाःसा संविधानसभाय् अःपुक हे बहुमत दैगु अले संविधानया मस्यौदा तयार यायेगु नितिं बहुमतं जक पारित याःसां गाःगु अवस्था दुगुलिं नेपाली कांग्रेस व नेकपा (एमाले)या ब्रम्हुवादी नेतात अथे न्हूगु राजीतिक समिकरणं यानाः हीमी चाःगु दु धकाः मनूतय्सं टिप्पणी यानाहःगु दु ।