माओवादीया कार्यकर्तातपाखें देय्न्यंकं मसाल जुलुस, चक्का जाम

प्रचण्ड व भट्टराईया पुत्ला च्याकल

येँ(झीगु स्वनिगः)

एकीकृत नेकपा (माओवादी)य कार्यकर्तातय्सं न्हापांखुसी थःगु हे पार्टीया नायः पुष्पकमल दाहाल व न्वकु नापं प्रधानमन्त्री डा. बाबुराम भट्टराईया पुत्ला च्याकेगु ज्या म्हिगः बुधवाः याःगु दु । देशय् गणतन्त्र हयेगु नितिं दक्ले तःधंगु भूमिका म्हिताः झिदँ तक जनयुद्ध याःपिं जनसेनायात शन्ति सम्झौता कथं समायोजन मयासे नेपाली सेनायात लःल्हाःगु विरोधय् म्हिगः बुधवाः एकीकृत नेकपा (माओवादी)या नेता व कार्यकर्तातय्सं उगु कथं पार्टीया नायः पुष्पकमल दाहाल प्रचण्ड व न्वकु नापं प्रधानमन्त्री डा. बाबुराम भट्टराईया पुत्ला च्याकल ।

एकीकृत माओवादीया बरिष्ठ उपाध्यक्ष मोहन बैद्य किरण पक्षया नेता व कार्यकर्तातसें विरोध प्रदर्शन यानाः पुत्ला च्याकेगु ज्या याःगु खः । पुत्ला च्याके न्ह्यः देय्न्यंकं थाय् थासय् द्वलंद्वःम्ह जनता व कार्यकर्तातय्सं मसाल जुलुस पिकाःगु खः । येँय् रत्नपार्क शान्ति वाटिका लागां मसाल जुलुस पिकायेगु धइतःसां न्हूसतकय् वयाः जक पिकाःगु खःसा यलय् लगंख्यलं अथे हे ख्वपय् सूर्य विनायक लागां मसाल जुलुस पिकाःगु खः । मसाल जुलुस थाय् थासय् चाःहिलाः क्वचायेकूगु खः ।

देय्न्यंकंया मसाल जुलुसय् माओवादीया उच्च तकया नेतातनिसें स्थानीय कार्यकर्तातय्सं तकं ब्वति कयादीगु खः । माओवादीया नायः प्रचण्ड व न्वकु भट्टराई नं कार्यकर्ता व जनसेनायात झंगःलात धकाः तसकं विरोध यानाः नारावाजी याःगु खः । माओवादीया नायः प्रचण्डया हे प्रस्ताव कथं जनमुक्ति सेना, शिविर, शिविरय् दुगु सामान तकं नेपाली सेनायात लःल्हायेगु धकाः सेना समायोजन विशेष समितिं वंगु मंगलवाः निर्णय याःगु खःसा उकियात माओवादीया बरिष्ठ न्वकु बैद्य पक्षं आत्मसमर्पणवादी ज्या यात धकाः द्वपं ब्यूगु दु ।

एकीकृत माओवादी नापं झिंनिगू घटक दुथ्यानाच्वंगु संयुक्त राष्ट्रिय जनआन्दोलन समिति नेपालं न्हापा हे म्हिगः चैत्र २९ गतेया दिनय् देय्न्यंकं मसाल जुलुस यायेगु धकाः घोषणा यानातःगु खःसा लिपांगु इलय् सेना समायोजन विशेष समितिं गुगु कथं जनमुक्ति सेनायात आत्मसमर्पण याकेगु कथं निर्णय याःगुलिं मसाल जुलुसया झ्वलय् हे एकीकृत माओवादीया नायः प्रचण्ड व प्रधानमन्त्री भट्टराईया पुत्ला च्याकेगु धकाः घोषणा याःगु खः ।

एकीकृत माओवादीया बरिष्ठ उपाध्यक्ष मोहन बैद्य किरण पक्षं सेना समायोजन विशेष समितिया निर्णय विरुद्ध नापं जनसंविधानया नितिं अझ सशक्त कथंया आन्दोलन यायेगु जुइ धकाः धाःगु दु ।

अथेहे मशाल जुलुसया झ्वलय् कोणसभाय् न्वंवानादिसें एकीकृत ने.क.पा.(माओवादी)या मूछ्याञ्जे रामबहादुर थापा बादलं न्हूगु नेपाः दयेकेगु अभियान न्ह्यागु उद्घोष यानादिल । थनिनिसें आन्दोलन न्ह्याःगु खँ कनादिसें बादलं मशाल जुलुसय् कथि बर्षे यानाः नेपाः मांया छातिइ घाः लाकूगु खँ नं कनादिल ।

शान्तिपूर्वक जूगु उगु मशाल जुलुसय् प्रहरीं ब्यापक रुपं दमन यायेत स्वःगु खः । थाय्थासं पिहांवःगु मशाल जुलुसय् लाठीचार्ज यानाः स्वंगु दर्जनं मल्याक आन्दोलनकारीतय्त घाःपा यानाब्यूगु खः । उगु ज्याझ्वः माओवादी व संयुक्त जनआन्दोलन समिति नेपाःया मंकाः ग्वसालय् जूगु खः ।

न्हूगु नेपाःया न्हूगु संविधानय् जातीय, भाषिक, लैंगिक नापं वर्गीय मुक्तया जुइगु कथंया खँ दुथ्यायेमाः धकाः माग यानाः वयाच्वंगु दु । उकिं उगु एजेण्डाय् सहमति जूगु थीथी राजनीतिक दल व मोर्चायात दुथ्याकाः संयुक्त राष्ट्रिय जनआन्दोलन समिति नेपाल गठन यानाः आन्दोलन यानाः वयाच्वंगु खः ।

गन गन चक्का जाम यात ?

म्हिगः बुधवाः एकीकृत नेकपा (माओवादी)या नेता व कार्यकर्तातय्सं देय्न्यंकं छक्वलं चक्का जाम याःगु दु । मओवादीया बरिष्ठ उपाध्यक्ष मोहन बैद्य किरण पक्षधरया नेता व कार्यकर्तातय्गु सक्रियताय् अथे चक्का जाम याःगु खः । जनमुक्ति सेनायात आत्मसमर्पण याकेगु ज्या एकीकृत माओवादीया हे नायः पुष्पकमल दाहाल प्रचण्डया निर्देशनय् जूगुलिं उकिया विरोधय् अथे सांकेतिक विरोध कथं चक्का जाम याःगु खः ।
सुथय् १० बजेनिसें ११ बजे तक सांकेतिक रुपं अथे चक्का जाम याःगु खः । देय्न्यंकंया जिल्ला जिल्लाय् अथे चक्का जाम याःगु खः ।