राष्ट्रिय शाक्य समाजया अधिवेशन क्वचाल
राष्ट्रिय शाक्य समाज नेपालया निक्वःगु राष्ट्रिय अधिवेशन क्वचाल । वंगु चैत २७ गतेनिसें निन्हुयंक न्ह्याःगु अधिवेशनं न्हूगु ज्यासना पुचः स्वनाः झःझः धाय्क क्वचाल ।
अधिवेशया निन्हुया न्हि जूगु बन्द सत्रपाखें प्रेम बहादुर शाक्यया नायःसुइ न्हूगु ज्यासना पुचः ल्यःगु खः । उगु ज्यासना पुचया न्वकुइ तीर्थमान शाक्य, मूछ्याञ्जेय् सुवर्ण शाक्य, छ्याञ्जे डा. लक्ष्मण शाक्य, ल्यूछ्याञ्जे अमृत शाक्य, दांभरिं पुष्प रत्न शाक्य व दुजलय् धर्मरत्न शाक्य, पुष्पराज शाक्य, ज्योतिरत्न शाक्य, गौतम रत्न शाक्य, हंसरत्न शाक्य, पूर्णकाजी शाक्य, जीवनकुमार शाक्य व भर्णमान शाक्यपिं ल्यःगु दु ।
३६गू जिल्लाया शाक्यतय्सं ब्वति काःगु उगु अधिवेशनं सकल शाक्यतय्त छधि यानाः थौंया इलय् शाक्यत थुकथं न्ह्याकेमाली धइगु बारे नं संस्थाया बिचाः सार्वजनिक याःगु दु ।
चैत २७ गते सुरू जूगु शाक्य समाजया अधिवेशनया उलेज्यालय् भिक्षु ज्ञानपूर्णिक महास्थवीरं पंचशील बिया बिज्यागु खःसा वसपोलं शाक्यत तसकं अनुशासित रुपं न्ह्यायेमाःगु खँय् बः बियादीगु खः । ९७दँया कयःदेवी शाक्य व ९६दँया सत्यरत्न शाक्यपिं मूपाहाँ कथं झायादीगु उगु ज्याझ्वलय् वय्कःपिंत भुलाय्गा न्यय्का हनेज्या नं याःगु खः ।
उगु ज्याझ्वलय् थीथी जिल्लां ब्वतिकापिंपाखें बोधिमत नं च्याकाः थःपिं बुद्धया शीलाचरणकथं न्ह्यानागु सन्देश बिउगु खः ।
समाजया न्वकु तीर्थमान शाक्यं लसकुस न्वचु बिया न्ह्याःगु मुँज्याय् संस्थाया ल्यू दाँभरी पुष्परत्न शाक्यं आर्थिक प्रतिवेदन व मू छ्याञ्जें प्रा. सुवर्ण शाक्यं प्रगति प्रतिवेदन न्ह्यःब्वयादीगु खः ।
बुद्धया गुणं जाःगु स्वागत म्ये कलाकारपिन्सं हाःगु उगु समारोहस प्यम्ह व्यक्तित्वपिंन्सं प्यंगू ध्वाँय् (शाक्य ध्वाँय्, नेवाःध्वाँय्, बौद्ध ध्वाँय् व राष्टिय ध्वाँय्) नं ब्वय्केगु ज्या जूगु खः ।
उलेज्याझ्व स्वयां न्ह्यः येँया विजयश्वरीं छगू र्याली पिकयाः नगर चाहिउगु खः ।
