सेरामिकया बारचा २ करोड डलरय् लिलाम

सेरामिकया करिब गुसः दँ न्ह्यःया छगः चिधंगु बारचा थंज्याःगु थल २ करोड ६६ लख व ५० हजार अमेरिकी डलरं लिलाम जूगु दु । चीनया सङ्ग वंशया धयातःगु थुगु थलःया लिलाम हङकङय् जूगु खः । हङकङय् जूगु ज्याझ्वलय् जापानी नागरिकं फोन‌पाखें दकलय् अप्वः मू तयाः उगु वस्तु न्यानाकाःगु खः । न्यानामिंया म्हसिका धाःसा अझ नं खुले याःगु मदुनी । थुगु मू सिरामिकया वस्तु लिलाम मध्ये आः तकया दकलय् अप्वः खः । थ्वस्वयां प्यदँ न्ह्यः छगः स्वांथल ८६ लखय् लिलाम जूगु खः ।

स्वाँ आकारया थुगु थलः दुर्लभ व कलाकृतिया ल्याखं सङ्ग वंशया दकलय् महान कलाकृति जूगु खँ लिलामी ज्याझ्वः संचालन याःगु सुदविज एसिया संस्थाया उपप्रमुख निकोलस चाउं धयादिल । हलिंमय् थःज्याःगु दुर्लभ कलाकृति ७९ग्वः जक दुगु अनुमान याःगु दु । उकी मध्ये मुक्कं न्यागः जक व्यतिगत रूपं मनूतय्सं न्यानाकायेधुंकल ।

More Stories Like this