युनिकोडय् नेपाल लिपि यंकेगु तयारी

येँ (सन्ध्या टाइम्स)/नेपाल लिपियात विश्वन्यंकं हे सहज रुपं छ्यले फयेकेत युनिकोडय् तयेगु ज्याय् व्यस्त जुयादीम्ह युनिकोडविज्ञ प्रो. पेट्रिक हलं नेपाः वयाः लिपि सम्बन्धी ज्या यानाच्वंगु संस्था व व्यक्तित नापलानाः सल्लाह ब्याकादीगु दु। थ्व झ्वलय् नेपाल लिपि गुथिपाखें नकतिनि याःगु छगू मुँज्याय् वय्कलं थ्व लिपिया नां 'नेपाल लिपि' तयेगु लाकि 'नेवाः लिपि' तयेगु धइगु बारे जिज्ञासा प्वंकादीगु खः। गुथिया नायः शरद कसाः 'कसाःछेँ', पुलांम्ह नायः प्रताप शाक्य, नेपालभाषा केन्द्रीय विभागया प्रमुख प्रा. प्रेमशान्ति तुलाधर, 'सन्ध्या टाइम्स'या सम्पादक सुरेश मानन्धर नं दुथ्याःगु उगु मुँज्याय् नेपाल लिपिइ आः म्ह, न्ह, र्‍ह, ञ्ह आदि थेंज्याःगु नेवाः सःया आखःग्वः नं तयेगु बारे नं सहलह जूगु खःसा लिपिया नां 'नेपाल (नेवाः)' तयेगु खः लाकि धकाः बिचाः ब्याकूगु खः ।