याहूं २ हजार कर्मचारीत कटौति याइगु

इन्टरनेट सेवा प्रदायक कम्पनी याहूं २ हजार कर्मचारीत कटौति यायेगु तयारी याःगु दु । अमिरेकाया क्यालिफोर्नियाय् याहू कम्पनीं थःगु कर्मचारीत १४ प्रतिशत कटौती यायेत्यंगु खः । थःगु बजाः सुधार यायेत याहूं कम्पनीया मुख्य कार्यकारी अधिकृत हे हिलेधुंकूसां बांमलाःगु बजारय् प्रतिस्प्रर्धा यायेत थाकुइवं थुगु निर्णय याःगु खः ।

न्हूगु रणनिति कथं याहूं चिधंगु तर चुस्त जुयाः ज्या यायेगु योजना कथं कर्मचारी कटौति यायेत्यंगु खँ धाःगु दु । कर्मचारी कटौती यायेधुंकाः दच्छिया दुने कम्पनीया ३७.५ करोड डलर बचत जुइगु खँ याहूं धाःगु दु । याहूं कटौति यायेत्यंपिं कर्मचारीयात राहत कथं १२.५ निसें १४.५ करोड डलरतक खर्च यायेमालिइफु खँ नं याहूं सार्वजनिक याःगु दु । कटौतिइ लाइपिं कर्मचारीया नां धलः याकन हे पिथनेगु व थुगु रणनीतिया घोषणा वइगु अप्रिल १७य् यायेगु निर्णय याहूं याःगु दु ।

सर्च इन्जिनया प्रतिस्पर्धाय् याहू गूगलया लिउने लानाच्‍वंगु दुसा गूगलया इमेल, अथेहे फेसबुक, ट्विटर थेंज्याःगु सामाजिक सञ्जाल साइटनाप नं याहू लिउने लानाच्वंगु दु । याहूया मू चिउता कम्पनीया आम्दानीइ वयाच्वंगु कमी खः । छुं दँया दुने हे याहूया आम्दानी ६३० करोड डलरं ५ सय करोड डलरलय् कुहांवःगु खः ।

More Stories Like this