गौचनपाखें द्राविड क्लिन बोल्ड !

आईपीएलया क्लब राजस्थान रोयलपाखें आईपीएल म्हितेत ब्वनापौ वःम्ह नेपाःया नांजाम्ह त्रिकेटर शक्ति गौचनं भारतया नांजाम्ह ब्याट्सम्यान राहुल द्राविडयात क्लिन बोल्ड यानाबिउगु दु । द्रविड भारतया पुलाम्ह कप्तान नापं सफल टेष्ट क्रिकेटर खः ।

गौचनं राजस्थान रोयलपाखें नेट प्राक्टिस यायेगु झ्वलय् द्राविडयात क्लिन बोल्ड याःगु खः । नापं गौचनं अस्ट्रेलियाया ब्रेड हजयात नं थःगु स्पिनया जालय् लाकाः आउत याये धुंकागु दु ।

थःगु प्राक्टिसया अनुभव कनेगु झ्वलय् गौचनं थःम्ह द्रविडया नेट प्राक्टिसया झ्वलय् आउट याःसां थःत गर्व लगेजूगु धाल ।

गौचनं छुं ई न्ह्यः जक जूगु आईसीसी टी-२० वर्ल्ड क्वालिफायर्सया झ्वलय् डेनमार्क नाप जूगु कासालय् ह्याट्रिक याःगु खः । थ्वहे प्रदर्शनया हुनिं राजस्थान रोयल्सं गौचनयात राजस्थान पाखें अभ्यास यायेत उखे सःतुगु खः । गौचनं अन आईपीएलया निंतिं अभ्यास यानाच्वंसां आईपीएलय् म्हितिगु खँ पक्का मजूनी ।

More Stories Like this