जागरणया न्हापांगु अधिवेशन
नेवा: जागरण मञ्चया न्हापांगु अधिवेशन वंगु शनिवा: ने.सं. ११३२ चौलाथ्व: दुतिया (चैत्र ११ गते) त:जिक क्वचाल । येँया नेपा: ब्याङ्क्वेट खुसिबुँइ जूगु नेवा: जागरणया दबू ज्याझ्व: लिपा अन हे कि्रयाशील दुज:तय्गु बन्द सत्र च्वंगु ख: । बन्द सत्रय् तदर्थ समिति विघटन अले २३ म्हेसिया न्हू कार्यकारी समिति ल्यज्या जूगु ख: । बन्द सत्रं निवर्तमान संयोजक सुजीव बज्राचार्ययात सर्वसम्मतं अध्यक्ष पदय् ल्य:गु ख:सा उपाध्यक्षय् हरिबहादुर मानन्धर व अमृत ताम्राकार अले महासचिवय् विजयकृष्ण श्रेष्ठयात ल्य:गु ख: । अथेहे निम्ह सचिव, कोषाध्यक्ष व ल्यूकोषाध्यक्षय् छसिकथं रत्नकाजी महर्जन 'लूनिभा:', सूर्यबहादुर श्रेष्ठ, बालकृष्ण खड्गी व पंकजचन्द्र श्रेष्ठयात ल्य:गु ख: । कार्यकारी सदस्यय् छसिकथं मुकेश मास्के, विजयरत्न असंबरे, राजेश्वर स्थापित, डेंगा मानन्धर, र्इश्वरमानसिंह डंगोल, कृतन श्रेष्ठ, श्रीकृष्ण मानन्धर, धीरज नेवा:, अनन्त तुलाधर, विद्यासागर ताम्राकार, दिनेश श्रेष्ठ, सन्तोषलाल श्रेष्ठ, मनोज तुलाधर, किरण ताम्राकार व सरोज शाक्ययात ल्य:गु ख: । बन्द सत्रं याकनं हे थीथी समिति गठन याना: कि्रयाशील दुज:तय्त जिम्मा बीगु नं निर्णय या:गु ख: ।
अथेहे पारस ताम्राकारयात कार्यसमितिया सल्लाहकारया रुपय् ल्य:गु ख: । अधिवेशनया लसताय् सुथसिया ८:३० ता इलय् बसन्तपुलिं छगू त:जिगु र्याली न्ह्या:गु ख: । र्याली जागरणया दुज:पिं नापनापं थीथी संघसंस्था व सर्वसाधारणपिसं नं ब्वति कयादीगु ख: । बंुंगं ल्याखे प्याखं नापं बाजंसहित र्यालीइ ब्वति का:गु ख:सा टोखां नं यक्व हे मनूतय्सं बाजंखल: सहित ब्वति का:गु ख: । अथेहे गोकर्णं नं बाजं थाना: र्यालीइ सहभागिता क्यंगु ख:सा फम्पिपाखें येँ देय्या दुर्लभ बलामि प्याखंसहित जुलुसय् ब्वति का:गु ख: । उलि जक मखु अन्तरजिल्ला युवा मञ्च नेपालनापं कराते कासाया कासामितय्सं नं थ:पिनि कासा म्हितेगु पोशाकय् हे ब्वति का:गु ख: । र्याली येँ देय्या दुनेया शहर लाय्कू मखं, वंघ:, जनबहा:, बालकुमारी, असं, न्हाय्कंत्वा:, थाय्मरु, त्यंग:, क्षेत्रपाटी, धल्को जुया: खुसिबुँइ च्वंगु नेपा: ब्याङ्क्वेटय् वना: सभाय् परिणत जूगु ख: । नेवा: जागरण मञ्चया निवर्तमान तदर्थ समितिया संयोजक सुजीव बज्राचार्यया सभापतित्वय् जूगु दबूया ज्याझ्वलय् मूपाहाँकथं प्रा. माणिकलाल श्रेष्ठ व पाहाँपिं नेवा: स्वायत्त राज्य मंका: संघर्ष समितिया सचिवालय कजि मल्ल के. सुन्दर, शिक्षाविद् लक्ष्मण राजवंशी, नेपा: राष्टि्रय पार्टीया नाय: डा. केशवमान शाक्य, नेवा: न्ह्यलुवा डा. महेशमान श्रेष्ठ, नेपालभाषा परिषद्या नाय: फणिन्द्ररत्न बज्राचार्य, एमालेया केन्द्रीय दुज: पूर्वमन्त्री कृष्णगोपाल श्रेष्ठ, पूर्वसांसद लक्ष्मीदास मानन्धर, नेपाल समाचार पत्रया प्रधानसम्पादक पुष्करलाल श्रेष्ठ, नेपाल उद्योग वाणिज्य महासंघया उपाध्यक्ष भाष्कर राजकणिकार व व्यवसायी रमेश महर्जनयात दबुली ब्वंगु ख: ।
ज्याझ्वलय् मूपाहाँ प्रा. माणिकलाल श्रेष्ठ, नेवा: न्ह्यलुवा मल्ल के. सुन्दर व सभानाय: सुजीव बज्राचायर्ं न्ववानादीगु ख: । स्वम्हं वक्तापिसं नेवा: जागरण मञ्चया स्थापना गतिविधिलिसें कया: वर्तमान अधिवेशनया बारे न्ववानादीगु ख: धा:सा विशेष याना: वर्तमानय् संविधानय् पहिचानया राज्य मच्वयेगु कुत: जुयाच्वंगु थुकिया नितिं दवाव व पहल याना च्वनेमा:गु खँय् ब: ब्यूगु ख: । नेवा:तय् दथुइया थजात, क्वजातया भावनायात नं क्व:थलेगु ज्या थुगु दबुलिं जूगु ख: ।
सभा न्ह्याकेगु झ्वलय् दकलय् न्हापां नेपा:या राष्टि्रय म्ये हायेकूगु ख:सा नेवा: स्वायत्त राज्यया म्ये अले नेवा: जागरण्ा म्ये नं हायेकेगु ज्या जूगु ख: । थुकथं नेवा: हकहित व संरक्षणया नितिं स्थापनाकालंनिसें सरोकार क्यना: संघर्ष यानाव:गु नेवा: जागरणं थ:गु न्हापांगु अधिवेशन झ:झ: धायेक त:जिक यायेत ता:ला:गु दु ।
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान वेश्यायात बेकमया मुद्दा नेवा: जागरणया सरोकार, लँतब्या यायेगु नामय् आदिवासी विस्थापित यायेमते
