लोककवि गणेशलालया सछिदँ बुन्हि

येँ (सन्ध्या टाइम्स)/लोककवि गणेशलाल श्रेष्ठया सछिदँ बुन्हिया लसताय् म्हिगः थन छगू ज्याझ्वःया दथुइ वय्कःयात लुमंकेगु ज्या जुल। कोपुण्डोलया सातोआकी भवनय् नेपालभाषा मंकाः खलःया ग्वसालय् जूगु प्रवचन ज्याझ्वलय् वय्कःयात म्हसिउपिं थीथी व्यक्तित्वतय्सं वय्कः सम्बन्धी लुमंति व वय्कलं चिनादीगु म्येँ न्यंकादीगु खः ।

ज्याझ्वलय् न्ववासें परराष्ट्रविद् हिरण्यलाल श्रेष्ठं लोककवि गणेशलाल श्रेष्ठं न्हापा भिमफेदी जुयाः स्वनिगः दुहां वयेमाःगु इलय् स्वनिगः दुहां वयेगु मू नाका भिमफेदीइ भजन, सांस्कृतिक ज्याझ्वःत यानाः नेवाः संस्कृतिया म्हसीका बीगु ज्या यानादीगु व अबले संस्कृतं जक हालीगु भजनयात जनतां थुइमा धकाः नेवाः भासं नं हायेकादीगु खँ कनादिल। साहित्यकार छत्रबहादुर कायस्थं लोककवि गणेशलालं उगु इलय् स्वनिगलं थीथी बाजं थाये सःपिं मनू ब्वना यंकाः जूसां भिमफेदीया सांस्कृतिक जीवनयात म्वाका तःगु पुलां खँ लुमंकादिल ।

नांजाःम्ह गायक भृगुराम श्रेष्ठं गणेशलालं चिनादीगु म्येँ थौंकन्हय् शिव भजन, कृष्ण भजन व ज्ञानमालाय् तकं हालेगु यानाच्वंगु दनि धासें वय्कलं चिनादीगु थीथी हास्य म्येँ हालाः न्यंकादिल। उगु हे ज्याझ्वलय् जनगायक लिसें प्राज्ञ रामकृष्ण दुवालं गणेशलालया भजन हालादीगु खः। भिमफेदीया भाषाप्रेमि महिन श्रेष्ठं गणेशलालं नेवाः भाय् व खस भासं जक मखु भिमफेदीइ यक्व दुपिं तामाङतय् लागिं तामाङ भासं नं म्येँ व भजन चिनादीगु खँ कँसें वय्कः बहुप्रतिभाशाली जक मखु बहुभाषी च्वमि नं खः धयादिल। भिमफेदीया मय्जु शान्ता श्रेष्ठं उगु इलय् गणेशलालं निर्देशन यानाः क्यनीगु दबूप्याखं बारे चर्चा यानादिल।
ज्याथम्ह संस्कृतिविद् सत्यमोहन जोशीया सभापतित्वय् जूगु उगु ज्याझ्वलय् नेपालभाषा मंकाः खलःया छ्यांज्ये नरेशवीर शाक्यं लसकुस व मय्जु देवकी श्रेष्ठं सुभाय् बियादीगु खः ।