नेवाः जागरण मञ्चया न्हापांगु अधिवेशन सुरु
नेवाःतय् दथुइ नेवाः भावना ब्वलंकेगु ताःतुना प्यदँ न्ह्यः नीस्वंगु नेवाः जागरण मञ्चया न्हापांगु अधिवेशन येँय् सुरु जूगु दु ।
'झी मुनेनु, नेवाः जागरण हयेनु । नेवाः हकहित व संरक्षणया निंतिं संगठित जुइनु' धइगु नारा बियाः न्ह्याःगु जागरण मञ्चया अधिवेशन प्रा. माणिकलाल श्रेष्ठं उलेज्या यानादीगु खः ।
येँया खुसिबुँस्थित नेपाः ब्याङ्क्वयेटय् जूगु उलेज्याझ्वलय् मू पाहाँ श्रेष्ठ २०१४सालय् थःम्हं जातिय स्वशासनया मुद्दा ल्ह्वनाःगु इलय् मुक्कं प्यम्ह जक थुकिया पक्षय् दुगु लुमंकादिसें थौं तकया इलय् द्वलंद्वः मनूतय् दथुइ जातिय स्वशासनया चेतना ब्वलने धुंकूगु धयादिसें लसता प्वंकादिल ।
अथेहे नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं पहिचान सहितया संघीयता वःसा ब्रम्हु-क्षेत्रीतय्गु अधिकार कटौति जुइगु थुइकाः हे इमिसं थुकिया विरोध यानाच्वंगु धयादिसें आः नेवाःतय्सं नं पहिचान सहितया संघीयताया बारे बांलाक थुइकाः निर्णायक संघर्ष यायेमाःगु धयादिल ।
जागरण मञ्चया दांभरी अमृतरत्न ताम्राकारं लसकुस यानादीगु ज्याझ्वलय् मञ्चया संयोजक सुजीव बज्राचार्यं नेवाः जागरण मञ्च छु खः धइगु विषयलय् कनादिल । वय्कलं नेवाः राज्य प्राप्ति व नेवाःतय् हक अधिकार सुरक्षित यायेत नेवाः जागरण मञ्च निरन्तर रुपं न्ह्यानाच्वनीगु धयादिल ।
जागरण मञ्चया अधिवेशनया बन्द सत्र शनिवाः हे जुइगु व उगु बन्द सत्रं न्हूगु नेतृत्व नापं न्हूगु कार्य समिति चयन याइगु ज्याझ्वः दु । प्यदँ न्ह्यः २०६४ साल चैत १४ गते येँया इतुंबहलय् छगू बृहत सभा मार्फत नेवाः जागरण मञ्च नीस्वंगु घोषणा जूगु खः ।
