श्रम व यातायात मन्त्री सरिता गिरी बर्खास्त
प्रधामन्त्री डाक्टर बाबुराम भट्टराईं श्रम व यातायातम्ँन्त्री सरिता गिरीयात बर्खास्त यानादीगु दु । पदीय मर्यादा हाजा“गाया ज्या याःगु धासें मन्त्री गिरीयात बर्खास्त याःगु खः । प्रधानमन्त्री ज्याकुथिइ थौं सुथय् सरकारयात समर्थन याःगु न्हय्गु दलनाप सहलह याना चीधंगु दलया हे सिफारिसय् प्रधानमन्त्री डाक्टर भट्टराईं श्रममन्त्री गिरीया पलेसा जनमुक्ती पार्टीया नायः मालवरसिंह थापायात नियुक्त यानादीगु दु । प्रधानमन्त्रीनापया सहलहखे चीधंगु दलया पाखें चुरेभावर राष्ट्रिय एकता पार्टीया नायः बद्री न्यौपानें श्रम मन्त्रीइ थापायात सिफारिस यानादीगु खः ।
मन्त्री गिरीं बैदेशिक रोजगार मेनपावर एजेन्सीया इनापय् बैदेशिक रोजगार विभागया महानिर्देशक पुर्णचन्द्र भट्टराईयात सरूवा यायेवं प्रधानमन्त्री डाक्टर भट्टराईं स्पष्टिकरण फ्वनादीगु खः । तर, मन्त्री गिरीं चित्त बुझेजुइगु कथं स्पष्टिकरण मबिइवं प्रधानमन्त्री डाक्टर भट्टराईं बर्खास्त यानादीगु खः । थ्वहे दथुइ चीधंगु दलनापया मुंज्याय् प्रधानमन्त्री डाक्टर भट्टराईं थःगु हे नेतृत्वय् राष्ट्रिय सरकार गठन याये मफःसां सरकार पुर्नगठन याना जूसां फुक्कसित कःघायेगु दाबी यानादीगु दु ।
