मांच्वसा जिं

गिरिजाप्रसाद जोशी

मांच्वसा जिं मोज मयासे तोते ।
जिगिजिगि च्वंगु थ्व जगते म्वाना,
सोंख मयासें तोते !
मांचो मोज मयासें तोते !

थ्व चेतनाया लागा गन गन
नायुगु मुखुलिं प्राण फ्याना जक
बोगु फसय् ल्हाय् , सासः सनसन ।
प्राण थ्व जगतं प्वीकै थें हे
च्वंक ख्युगु खसु घननन घननन
हासां, ख्यासां ग्याय‍्मखु लाय‍्मखु
नुगलं दुःख, मि लागु लँय् नं
खसुया तंया मि जिगु होशे
तागत लिस्य च्वींच्वींपुक घाना,

स्वर्ग परित फुक थन सःते !
मांचो मोज मयासें तोते !

जिं सासः ल्हाःलिस्य संसार
जिगु ज्वी, जिगु जीवन भुंवोगु
होश लिस्यं न्ह्योने मुंवोगु
जिगु जगत दै, गन, जिं जिगु ख्वबि
त्वंवैपिं क्वेँ काली ख्वाःत,
बैस जती नं इन्द्रधनुं थें
रंग मबोसें सिसिं म्वात
संध्याया अय‍्लाखं काय‍्का, थः तंका
प्याखं व्ही नंका, जिगु सुख संध्यानापं मंका
याना फुक सित कक्कुतिना जिं
मखमलया लासाय‍् जक न्हुन्हुं ।
अमिगु न्यता क्वेँयागु च्वकां, कंया ज्या नुगलं मकया
व सर्गते च्वपिं द्योतलिसे
स्वर्गे च्वपिं व लः, मि, फय् फुक
मांच्वसा जिं ल्वाजक ल्वाना

लाका महःस्य हे तोते !
मांचो मोज मयासें तोते !

जिगु सासःया योगु समालं
जागु थ्व, आह ! जिगु संसार ! आह प्यार

सुथ संध्यालिस्य शून्य तिस्सिया
जिगु सासःलिस्य सुल्य वया
व्हैच्वंगु व स्वां लहरालिस्य आ
सुल्लपाच्च म्हिताच्वंगु स्वया,
हूँ घच्यापुस्य च्वपिं खिति हे
पाँय‍्पाँय‍् थाना, मरया हाना,
की थें खालि थःगु व प्राणे जक यग्गाना
च्वपिं जिगु सुख स्यंकः वइपिं
मांचो सुं नं तय् जिगु जगतय्
न्हाय‍्कं च्वाकं लानातःगु थ्व लँय् नं
स्वर्ग वनेगु लँ स्वाना,
अनया सीगु व आत्मातय‍्त
ख्यूंगु सुपाँय‍् लिस्यथनया फय‍् फुक उख्य घ्वाना,
स्वर्ग महःसे तोते
मांचो मोज मयासें तोते

कँथं चुप्पा नैच्वंगु थ्व पालि
व कंया कण कण लाना
मखमलया जक थाय‍् याना अल्य
जन्म थ्व तुतिया याना
अल्य थ्व चेतनां थःत म्हसीकेत
गनं गनं मेथाय‍् हे वना,
कंथे छकःनिं न्हू वनेमाली
सासः पतिकं सवा, फ्वना !
अल्य थ्व मिखां ला मांच्वसा जिं
समा मदुगु छुं छुं हे स्वय् ।
मसागु नं नय‍्मखु अल्य ला जिं
नँया बजि ला मांचो न्ह्ये ।
थ्व पला ?
थ्व पाल ला माँचो जिं
मखमल मखय‍्क गनं हे तय् ।
निभाद्यवं यागु व चांन्हि जक
थ्व चेतनाय् जिं होश थना
न्ह्ययोने च्वंगु थ्व पृथ्वी थ्वना
मांचो मोज मयासें तोते !

१०८० स नेपालभासा साहित्य पाला (त्रिचन्द्र कलेज) पाखें ग्वासालय् जुगु अन्तर कलेज नेपालभासा साहित्य सम्मेलनस न्हाप लाःगु चिनाखं

More Stories Like this