नेवाः पत्रकारतय् सम्मेलन सुरु
नेवाः पत्रकारतय् न्हापांगु राष्ट्रिय सम्मेलन सुरु जूगु दु । प्रो. माणिकलाल श्रेष्ठं नेवाः पत्रकार राष्ट्रिय दबूया न्हापांगु सम्मेलनया उलेज्या यानादीगु खः । मारुया महाद्यः पार्वती दबुली जूगु ज्याझ्वलय् मू पाहाँ श्रेष्ठं त्वाःदेवाय् मतः च्याकाः सम्मेलनया उलेज्या यानादीगु खः । उलेज्या धुंकाः छुं ई लिपा येँया शान्ति निकुञ्जय् पत्रकार दबूया बन्द सत्र न्ह्याइगु ज्याझ्वः दु । उगु हे बन्द सत्रं दबूया न्हूगु नेतृत्व ल्यइ ।
थ्वस्वयां न्ह्यः सुथय् शान्ति बाटिकां पिहांवःगु र्याली मरुइ वयाः सभाय् हिउगु खः । सभाय् मू पाहाँ श्रेष्ठ नापं वरिष्ठ नेवाः संचारकर्मीपिं प्रकाशमान सिंह प्रधान, हरि श्रेष्ठ व खड्गमान बज्राचार्ययात सम्मान याःगु खः ।
दबूया नायः श्रीकृष्ण श्रेष्ठया सभापतित्वय् जूगु ज्याझ्वलय् नेपाल पत्रकार महासंघया महासचिव ओम शर्मा, रेडियो गणतान्त्रिक संचारकर्मी मञ्चया अध्यक्ष राजु लामा व नेपाल प्रेस युनियनया महासचिव किरण पोखरेलं पत्रकारतय् हक हितया निंतिं गठन जूगु थुगु दबूया ल्यूने थःपिं व्यत्तिगत व संस्थागत रुपं न्ह्यावलें दइगु प्रतिबद्धता प्वंकूगु खः ।
सभाय् सभासद् मंगलसिद्धि मानन्धर, बुद्ध साय्मि, नेवाः देय् दबूया नायः नरेश ताम्राकार, नेवाः स्वायत्त राज्य मंकाः संघर्ष समितिया नायः मंगल महर्जन, नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दर लगायतं पत्रकार दबूया सफलताया कामना यासें नेवाःतय् मुद्दायात संचार माध्यमय् सशक्त ढंगं ल्ह्वनेत पत्रकार दबू सफल जुइगु विश्वास प्वंकूगु खः ।
दबूया छ्याञ्जे उदेन न्हूसाय्मिं लसकुस यानादीगु ज्याझ्वलय् दबूया न्वकु उपेन्द्र श्रेष्ठं सुभाय् बियादीगु खः ।
