याहूपाखें फेसबुक विरूद्ध मुद्दा दायर

इन्टरनेट कम्पनी याहूं थःगु झिगू पेटेन्ट अधिकारया उल्लंघन याःगु द्वपं बियाः फेसबुक विरुद्ध मुद्दा दायर याःगु दु । मुद्दा दायरनापं प्रख्यात निगू इन्टरनेट कम्पनी याहू व फेसबुक दथुइया विवाद आः अदालत तक थ्यंगु दु । याहूं फेसबुक विरूद्ध क्यालिफोर्निया दक्षिणी जिल्ला अदालतलय् मुद्दा दायर याःगु खः ।

सन्देश छ्वयेगु, विज्ञापन क्यनेगु, बुखँया जानकारी बिइगु, जालसाजी दिकेगु नापं थःगु मौलिक जानकारी बचे यायेगु थंज्याःगु थःगु बौद्धिक प्राधिकार फेसबुकं छ्यःगु द्वपं याहूं बिउगु दु ।

फेसबुकं धाःसा याहूया द्वपं अस्वीकार याःगु दु । फेसबुकं ताः ई तक व्यापारिक साझेदार जूगुलिं निगूलिं कम्पनीयात फाइदा जूगु लुमंकूसें याहूया थुगु पलाखं थःपिं निराश जूगु प्रतिक्रिया बिउगु दु ।

थ्वस्वयां न्ह्यः सन् २००४य् नं याहूया गुगलनाप थंज्याःगु हे विवाद जुयाः इन्टरनेटया संसारय् तरंग ब्वलंकूगु खः ।

More Stories Like this