मदुम्ह भन्तेया लुमन्तिइ अनित्य स्मरण सभा

अखिल नेपाल भिक्षु महासंघया पुलांम्ह नायः व आनन्दकुटी विहारया प्रमुख नापं त्रिपिटकाचार्य उपसंघनायाक मदुम्ह कुमार काश्यप महास्थविर दिवंगत जुयाबिज्याःगु लुमन्तिइ थौ अनित्य स्मरण सभा जुल ।

येँया आनन्दकुटी विहारय् जूगु उगु सभाय् मूपाहां संघनायक अश्वघोष महास्थविरं संसारय् फुक्क अनित्य खःसां मरण नित्य खः धयाबिज्यासें मदुम्ह कुमार काश्यप भन्तेया ब्यवहार नापं थेरवाद बुद्धशासनय् बियाबिज्यागु योगदानया बारे चर्चा यानाबिज्यात । अथेहे न्हूम्ह उपसंघनायक ज्ञानपूर्णिक महास्थविरं सुयात नं नुगः स्याके मयःम्ह कुमार भन्ते धार्मिक व व्यवहारीक कथं छम्ह पूर्ण बौद्ध चरित्र दुम्ह धयाबिज्यासें नेपाःया ततःधंपिं मदयावनाच्वंगु व नेपालय् थेरवादी बुद्धशासनयात धिसालाक्क न्ह्याये मफयाच्वंगुलिं थुखेपाखे न्हूपुस्तापिन्सं बिचाः याये हथाये जुइधुंकूगु बिचाः प्वंका बिज्यात ।

सभाय् भिक्षु कोण्डन्यं "आचार्य भिक्षु कुमार काश्यप धार्मिक कोष"यात संस्थानुकरण यायेमाःगु खँय् बः बियाबिज्यात ।

आनन्दकुटी विहारया नायः मैत्री महास्थविरया सभाध्यक्षताय् जूगु उगु सभाय् अखिल नेपाल भिक्षुणी संघया अनागारिका डा. अनोजा, मदुम्ह भिक्षुया शिष्य अस्सजित, धर्मोदय सभाया पद्मज्योति कसाः, भाषा सेवी नरेशवीर शाक्य, पाल्पाया ज्ञानकाजी शाक्य, श्रीलंकाया राजदूत लिसेंया ब्यक्तितय्सं मदुम्ह भिक्षु कुमार काश्यप महास्थविरया व्यवहार व योगदानयात कयाः चर्चा याःगु खः ।

भिक्षु कुमार काश्यप महास्थविर वंगु फागुण १४ गते दिवंगत जुया बिज्यागु खः ।

More Stories Like this