बायावंगु लँपु

बिमलप्रभा बज्राचार्य

छन्हु जि तिंख्यलिक्क बिजुली ज्याकुथी मतया ध्यबा पुलाः काय्या निंतिं सफू न्याय्त भोताहिति स्वयाः थःगु मतापय् वनाच्वना । लँय् मनूत म्वःम्वः जुयाच्वन । सकलें थःथःगु गन्तब्यय् थ्यंकेत हथाय्चाः पहलं जुयाच्वन । न्हिनसिया पाय्छि १ ता जुल जुइ, आकाझाकां छम्ह बाज्यःति वंम्ह मिसां मुसुहुं न्हिलाः जिगु ल्हः ज्वन । जि थाराक्क न्हुल । उजुंसुजुं जिं म्हसीके मफु ।

"म्हमसिलला चकना ?" वं न्हिले थें न्हिलेथें याना न्यन । वयागु सलं म्हसिल । काचाक्क वयागु नां म्हुतुइ मवयाः न्ह्यपुइ तिबः बिया ।

"अं नःलि ! यक्व लिपा ........... ।
जिपिं निम्हं न्हिला ।
"गन वने त्यनागुलय् -" जिं न्यना ।

"बागबजाः तक वनेगु ज्या दयाः" वं न्हिलेगु कुतः यायां धाल । तर वयागु निहलाय् छुं लय्ता मदु । वयागु ख्वाः खनाः जि अजु चाल । न्हापा गुलि बांलाम्ह, चंचंधाःम्ह, व हे मखुला धइथें च्वं । धाथें वं नमतुसा ला म्हहे सीगु मखु ।

"थौंला आकाझाकां नापलात । म्हं फुला ?" जिं न्यना ।
"पाय्छि हे जू धाय्माली" मछिं पहलं लिसः बिल ।
"मखु नःलि छन्त छु जुल ? म्हं मफु थें च्वं ।"

वयागु लिसः न्यने हथाय् चाल । वयागु ख्वाः तुंक स्वइच्वना । ख्वाः नं गरखेसे च्वं । ज्याथि ख्वाः वय् धुंकल । न्हापाया चहक छतिं मदु । गंसि जुयाच्वन । पुलां पहःया कुर्ता लं फिनातःगु दु । न्हापा गुलि ल्वय्क वसः पुनाजुइम्ह । धाथें न वयात छु तःधंगु दुःख जुल जुइ । मोटरसाइकलं "टुईटुई" तसकं हर्न न्याय्कल । जिपिं सिथय् लाक्क लिचिला । नःलिया छुं खँ कने नं मास्ति वःथें च्वं, हथाय्चाः पहः नं खनेदु । बागबजारय् वनेधाःम्ह जिनापंतुं वल ।
"थौकन्हे छुयाना च्वनालय् चकना ?" लेंय् ववं नःलिं न्यन ।
"ब्वनेकुथीलय् स्यनेगु यानाच्वना । थौं आइतबार स्कूलय् बिदा दु । अथेजुया पिहां वयागु ,"
जिपिं रानीपुखुया सिथय् शान्तिवाटिकाय् गणेशमानया झ्वाताया न्ह्यःने छगू ताहाकःगु मेचय् फेतुना ।

नःलि जिमि पुलांगु छेँया नापसं च्वंम्ह खः । ब्वनेकुथीलय् नापं ब्वनाम्ह पासा । छेँय् बराबर वयाच्वनी । जिपिं मेथाय् छेँ दनाः च्वंवंसांनिसें नापलायेगु तापानावन । तःधिकःम्ह याकःम्ह्याय्, वया क्वय् न्याम्ह किजापिं दु । याकःम्ह्याय् जुयाः सकसिनं ययेका च्वंम्ह, हिसिं भय्ब्यूम्ह न्ह्यामसित नं न्हिलाः न्वतुयाच्वनिम्ह, न्ह्याबलें मुसुका ख्वाः ।

मेचय् फेतुनाः जिं नःलिया ल्हाःज्वना "का धा छन्त छु जुल ?" छगू आत्मीय भावं न्यना । जिगु सलं वयागु मनय् थिल्ला मस्यू, वं जिगु ल्हाः ज्वनाः मिखा जाय्क ख्ववि तल । गबाय्त नं छुं हे धाय्मफु । मानौं वया ख्वबिधाः गनं हाय्के मखना च्वंगु बल्ल प्वंके थाय् लूगुथें ख्वबिधाः न्यतालं क्वय् तिकिनन । जितः न वयागु अवस्था खंबलय् नुगः मछिना वल । गाच्वतं ख्वबि हुहुं वं तीजक न्ववाय्त स्वल ।

"जिं तसकं दुःख सिल ।" हानं हिकुहिकु लन ।
"जि किजाभौपिनि भ्वातिं जक मखु, न्हिन्हि नुगः हीक म्वामदुगु ध्याचु न्यनेमाः । न्यनेहे मयःगु खँग्वलं कय्का च्वनी ।”

"छम्ह मिजं कय्च्याना पय्नं वने भाःमखंम्ह ।" न्ह्यागुधाःसां मिखा तिसिना सह यानाच्वना ।" नुगःमछिं पहलं कन । " छन्हु बहनी जि निनियाथाय् छेंय्नं लिहां वयाबलय् ८:३० जुल । जा नये धकाः थाहां वना । राइसकुकर चायका । छपन्युचा जा बाहेक छुं हे मदु । प्वंगु थलबलत छ्यातांछ्यातां तयातल । हीमी चाल । तसकं नुगलय स्यात । न्ह्यागुसां नयमालीका धकाः स्वया । बजि न मदु । सकले थःथःगु कोथाय् वनातय् धुंकल । थःगु कोथाय वना । लः छगिलास त्वनास् सुंक देना ।
"अपाय्सकं मतिना याना ब्वलंकातयापिं किजापिसं हे छसः न्ववानाबीगु मखु । जितः व छेंय म्वाय् थाकुल । जि छु याय्गु गन वनेगु ?" हानं वयागु मिखां ख्वबि हाल ।
"ख्वयमते नःलि, नु जिमिथाय् छेँय् वना बांलाक खँल्हाये ।"
"छेँखा दाःजुइम्ह धाइ, जि वनाहे छ्वय् ।"
हथाय् चाया नःलि वाथाक्क दन । ख्वाः छकः हुल । वया झ्यातुगु कु छकु दिकाः याउंसेच्वंम्ह थें, सुईंसुईं वनाछ्वत ।
जिं छुं हे धाय्मफु । मिखां खनेदतले वइत स्वइच्वना । छकःहे लिफः मस्वसे नःलि भाताभाता वनाच्वन ।
भारी क्वबुयाम्ह थें झ्यातुगु मनं जि नं पलाः न्ह्याका ।

पलाः पतिकं नःलिया न्हापाया लु झल्झलि मिखाय् दंवया च्वन । जिमि छेंजःपिसं अमिथाय् छेंयागु खँ फुक्कं सिउ । अपिं चिह्रिबलय् हे मां बौ मन्त । नःलि एस.एल.सि. तक जक ब्वनेखन । मेपिं किजापिं स्कूलय् ब्वनाच्वन तिनि । नःलिया ल्यासेचागु बैंस । छुं हे मयाःसां गुलिजक बांलाःगु । जिमिसं हायका धाये, "जिमित हे छ गुलि बांला धाःसा मिजंतयसं गुलिजक ल्वःवंकीगु जुइ ।" वं न्हिलाः तरेयाइ । नःलिया छेंज्या फुक्क याय्माः। अय्नं छतिं उसि मचासे ज्या याइ । नःलि मचांनिसें बुरी धन्ना कया ज्या याय्माः । न्यातजाःगु छेंय् । च्वय्या नितं थःपिसं छ्यलाः मेगु फुक्क बालं बियातःगु । मां बौ बिहिन जः जूसां मतिनां भय्ब्यूगु तःकेंहेंया जः। किजापिंनिगु लागि थःहे कलेज वनेगु त्वताबिल । छम्ह मांया भाला थें छेंज्या फुक्क कःघाना किजापिन्त ब्वंकेगु नं भाला काल ।

छन्हु नःलिया निनिं छगू बांलागु थासं खँ वःगु कन । थ्वया न्ह्यः नं यक्को हे धाःवःगु जुयाच्वन । धाःमवइगु नं गन । ल्यासेबलय् नःलिया रुप धाय्ला, बानी ब्यहोरा धाय्ला सुनां नःलियात ध्वय् फइमखु । "खःथाय् ज्यूथाय् इलय्हे इहिपा याय्माः, न्ह्याबले ज्वभन उथें जुइमखु ।" यक्को हे खँ न्यंकल । "मखु निनि, जिं इहिपा याय्मखु, किजापिन्त स्वय्माः ।" धयाछ्वत । नःलिं थःगु जीवन किजापिनिगु लागि हे फ्यायेगु भाःपिल ।

किजापिं नं छम्ह सिवय् छम्ह बांलापिं ब्वनीपिं जुया पिहांवल । जागिर नं बांलाथाय् दत । "मां बौ मदुसां ततां ब्वलंकुगुलिं जिपिं थासय् थ्यंगु खः धकाः ततायात तारिफ यानाच्वनी । नःलि नं थः ब्वनेगु पूवंके मफुसां किजापिं थासय् थ्यंगुलिं लय्ताः । किजापिसं कमेयानाहःगु तलब फुक्क ततायात स्वथंके बियातइ । थजाःगु छेंजलय् लय्ताया च्वंम्ह नःलि थौं छुजूगु ?" मनय् खँ वाय्कु वाय्कुं जि छ्येँ थ्यन ।

अनंनिसें जिं हानं नःलि नापमलाः । फोन नम्बर नं काय्ल्वःमं ।

दच्छिति लिपा छन्हु शनिबाः न्हिनसिया १२ ता इलय् जिमिगु छेंया घन्टि न्यात । काय्नं "सु वःगु जिं म्हमस्यू" धाल । कःसी वसः हियाच्वनाम्ह दिनाः झ्यालं स्वया । नःलि वास्यां न्हिला च्वय् स्वल । "अय् नःलि ला" धया । हानं छु जुल जुइ मनय् तया हथासं खापा चाय्क वना ।

"ओहो । खइला थौं, वा वइ । गन वना वयागु ?" न्यना । नःलि नं न्हिला थुखेर ज्या छगू दया वइगु, लँकथं लाःगुलिं छन्त छकः नापलाना वने धकाः वयागु ।" कन । थौं वयागु ख्वाः पुन्हिया मिला थें चकं । ल्होना बाँलाना च्वन । वयागु मुसुकाः ख्वाः खंबल् जितः हे मन याउंसे च्वन । जिगु मनय् जक मतसे धाहे धया " नःलि छ थौं न्हापा थें हे बांलाना च्वन ।

“अबलेनिसें नाप नं मलाः । जिं बराबर छन्त लुमंकाच्वना ।"
"छं लुमंकुगुलिं वयागु खः" ख्याः याना धाल । “तलय् नु धाय्गु मखुला ? बरु पलख जक च्वने ।"
जिं छुं धाय् मलावं छगू हे सासलं खँ पूवंकल ।
निम्हं थाहां वया । क्वथाय् च्वना ।
"च्या दाय्के न्हि ?"
"मखु जानया वइगु ताउ मजानि लिपा च्या जक मखु ज्यःनाहे यायेका ।" वया जितः खँकने हथाय् चाःगु खनेदु ।

"स्वरे चकना, उकुन्हु बेलि सिधय्का किजापिन्त ब्यागलं च्वनेगु धकाः तछ्याना हे धयांला कलाःपिनिगु ख्वाः जक स्वयाः छम्हस्यां हे नमवाः । खुरुखुरु थःथःगु क्वथाय् वन । कन्हेकुन्हु जिमि निनियात जूगु दकों खँ कना । निनिं वना इमित खँ न्यंकल नं खँहे बांलाक मन्यं हं । उमिगु तापाना बिस्यूं जुइगु थें जाःगु पहः खसेंनि छन्हु जिं धया । "जि छिपिंनाप च्वने मफुत ।" अय्नं अमिसं अंश इनेगु चिउता मक्यं । त्वाःबहाया थकालिपिं न्ह्यःने तयानं खँ ल्हानाः मजिसेंलि सरकारी ज्याकुथी भ्वंभिं तःजुइमाल ।"

"आः जि याकःचा हे च्वनेधुन ।" मानौं व छगू युद्धय् त्याःम्ह थें गौरब ताय्का धाल ।
जिंनं धया "छं बांलागु निर्णय यात । छंगु आत्मबल थथे हे बल्लाय्माः ।"
"जि थुलि च्वनेत तःधंगु हे संघर्ष याय्माल ।" मेचं दन । " वनाहे छ्वय्" घडी स्वल । "लिवात" धाधां कुहां वन ।
ल्यूल्यू जि नं कुने थ्यंक तःवना ।
"वनेन्हि ...." वयागु सलय् लय्तापह दु ।
ननिचां पुला मवंतले स्वइच्वना ।
छकः लिफः स्वल । छ्यों संका "न्ही .............." धका छ्यों भाय् याना वन । वयागु पलाखय् धिसिला पहःदु ।

More Stories Like this