लुम्बिनीइ नेवाः विहारया जग स्वन
येँ (सन्ध्या टाइम्स)/ बुद्ध जन्मभूमि लुम्बिनीइ नेवाः परम्परा कथं बज्रयानी विहार दयेकेत थौं जग स्वनेगु ज्या जुल। नेपाल परम्परागत बौद्ध धर्म संघया कुतलय् बज्रयानी विहारया जग स्वनेगु ज्या जूगु खः ।
थौं सुथंनिसें हे जग स्वनेगु नितिं लुम्बनीइ विशेष पुजा जूगु दु। बज्रयानी विहारया निंतिं पीच्यागः पिल्लर थनाः पीच्याम्ह हे गुर्जुपिंसं पुजा यासें कलश प्रतिस्थापन याःगु खः। नेवाः शैलीं दयेकीगु थ्व विहार स्वदँया दुने क्वचायेकेगु ग्वसाः दु। उगु जग स्वनेगु ज्याय् पं. बद्रीरत्न बज्राचार्यंया उपाध्यायत्वय् डा. नरेश वज्राचार्य मूलाचार्य जुयाः पुजा न्ह्याकूगु खः। विहार दयेकेत ध्यबा ग्वाहालि यानादीपिं पीच्याम्हेसित जय्मां कथं पुजाय् दुथ्याकूगु खः ।
लुम्बिनीइ जर्मनीया विहार लिक्क नेवाः परम्पराकथं बज्रयानी विहार दयेकेत लुम्बिनी विकास कोषं १३ रोपनी जग्गा उपलब्ध याःगु खः। अन न्यागू करोड तकाया लागतय् विहार दयेकेगु ग्वसाः दु। म्हिगः ८० लाख तका दां मुंगु खः। नेपाल परम्परागत बौद्ध धर्म संघया ग्वसालय् थ्व विहार दयेकेत्यंगु खः ।
