खवरदार ! !

रजनीमिला

जिमिगु देशया जन्हुफातय्
न्ह्यां बले न्ह्याँ न्ह्याँ थे सना
छिमिसं तायेकाच्वंगु दु
तःकः मछि खुल्ला मंचय् तयाः बलात्कार याःसां
सुनानं थः नाः मदुम्ह मिसामचा थें !
छिमिसं तायेकाच्वंगु दु,
थ्व देय्या काय् म्ह्याय्पिं दक्क
छिमिसं यँ यँथाय् ल्यू ल्यू वैपिं च्वलेचात थें ! !

उकिं जिमित हाः हाः थे हायेकाः
मतापलं
देय्या धुकुतिइ तुति झ्वःलंकाः
छिमिसं
जिमिगु विश्वास, आस्था व स्वाभिमान दुयाः
हासिं हायावःगु रमनापं
जिमिगु ब्वहलय् धस्वानाच्वंगु थ्व देशया
छपू छपू क्वेँ साय्का सवाः काकां नैच्वंपिं
छिमित
जिं जक छाये मधाये
छिपिं गिद्धया मेगु रुप खः !
छिपिं कोया नख्ख्वं जात खः ! !

जिमि दाजुकिजा, तः केहेँपिसं थःपिंगु नुगःपा बसालायाः
दुकागु गुगू राज खः ,
थौं जिमिगु नःलिगु र्सार्वभौमिक म्हगसयात
छिमिसं
सितु हः तायेकाः
गबलें च्वत्तुच्वलाः गबलें न्हुत्तुन्हुयाः,
गबलें थ्व देय् क्वःबियाच्वनापिं जिमिगु छ्योंयात
फुटबल तायेकाः
वं छकः थ्वं छकः
पालंपाः थ्वात्तुथ्वानाः
थःपिंगु स्वार्थया पोष्टय्
गोल यानाच्वंपिं
छिमित
जिं जक छाय् मधाये
छिपिं धोंया दुरुष्ट स्वभाव खः !
छिपिं दुश्मनया कःति समान खः ! !

थ्व शहरं वांछ्वइ थकुगु र्सवजातया फोहरथें
उखे वांछ्वये ला थुखे वांछ्वये ला छिमित
जिमिगु देश !
थौं जिमिगु नुगःपाय् दनाः
जिमित हे पानाः जू म्हितीपिं
ए बाह्रमासे नेता त
जिमिगु र्सार्वभौमिकता पानाः
खवरदार
छिमिसं गुगू नं जू आः निसें म्हिते दै मखुत !
जिमि देया धुकुतिं ल्हृययाः
छिमिसं त्याः व बूया हिसाब क्यने दै मखुत ! !


ने.स ११३२ चिल्ला थ्वः दशमी

More Stories Like this