स्वनिगलं पिने नं नेवाः पत्रकार दबूया संयोजन समिति

येँ (सन्ध्या टाइम्स)/वइगु चैत्र ४ गते नेवाः पत्रकार राष्ट्रिय दबूया न्हापांगु राष्ट्रिय सम्मेलन यायेगु झ्वलय् स्वनिगलय् नापं स्वनिगलं पिने नं जिल्ला स्तरीय समन्वय समिति गठन यायेगु ज्या जूगु दु। वंगु शनिवाः काभ्रे जिल्लाय् अनया नेवाः पत्रकारतय्गु छगू भेलाया दथुइ नेवाः पत्रकार राष्ट्रिय दबू काभ्रे जिल्ला समन्वय समित गठन यायेगु ज्या जूगु दु। नेवाः पत्रकार राष्ट्रिय दबू राष्ट्रिय सम्मेलन मू ग्वसाः खलःया कजि श्रीकृष्ण महर्जनया उपस्थितिइ बनेपाय् जूगु नेवाः पत्रकारतय्गु भेलां नमोबुद्ध एफ एमया रमा कारंजितया संयोजकत्वय् काभ्रे जिल्ला समन्वय समिति गठन याःगु दु। सदस्य सचिवय् 'झीगु स्वनिगः' न्हिपौया पुष्पदास स्याउला च्वनादीगु दु। अथे हे दुजलय् मिसन स्टार टेलिभिजनया हरिदास श्रेष्ठ, निरञ्जन प्रकास कायष्ठ, विकास शाक्य, रेडियो सेफर्डया बुद्धरत्न मानन्धर, पूर्णिमा रंजितकार, रेजीना श्रेष्ठ, 'झीगु स्वनिगः' न्हिपौया कृष्ण गोपाल कर्माचार्य, सर्मिला श्रेष्ठ उकथं हे भुवन भोछिमोया (चेष्टा वाःपौ), पूर्णसागर रंजित (सुनकोशी वाःपौ, प्रशान्त श्रेष्ठ (स्वतन्त्र फोटो पत्रकार) च्वनादीगु दु। अथे हे सल्लाहकारय् मोहन दुवालयात ल्यःगु दु ।

उकथं शनिवाः हे नेवाः पत्रकार राष्ट्रिय दबूया कजि महर्जनया नेतृत्वय् ख्वपय् जूगु भेलां अन्नपूर्ण पोष्टया कृष्ण किसिया संयोजकत्वय् ख्वप जिल्ला संयोजन समिति दयेकेगु ज्या जूगु खः ।

भक्तपुर एफ एमया सिमान्त सिल्पकार सदस्य सचिव जुयादीगु उगु संयोजन समितिइ कृष्ण श्रेष्ठ (थिमि टाइम्स), सुरेश प्रसाद सैंजु (जनसंचार एफ एम), हरिकृष्ण दुवाल (हाम्रो च्यानल), इश्वरकाजी खाइजु (अन्नपूर्ण पोष्ट), ज्ञानबहादुर मानन्धर (हाम्रो च्यानल), लक्ष्मी गारु (राष्ट्रिय समाचार समिति), जगतकृष्ण प्रजापति (न्युज अफ मासिक), सुमन श्रेष्ठ (थिमरिङ लय्पौ), केशव वाकजु (जनसंचार एफ एम), सुरेन्द्र श्रेष्ठ (सन्ध्या दृष्टि), दिपक श्रेष्ठ (थिमि टाइम्स) व धर्म मानन्धर (हाम्रो च्यानल) च्वनादीगु दु ।

उकथं हे स्वनिगलं पिने थाय् थासय् जिल्ला स्तरीय संयोजन पुचः दयेकेगु ज्या तिब्र रुपं जुयाच्वंगु खँ नेवाः पत्रकार राष्ट्रिय दबुलिं धाःगु दु ।