भिक्षु कुमार काश्यप मंत
येँ (सन्ध्या टाइम्स)/संघ उपनायक भिक्षु कुमार काश्यप महास्थविर मंत। उसाँय् मदयाः थनया काठमाडौं मोडल अस्पतालय् वासः याका बिज्यानाच्वंम्ह वसपोल ८५ दँ दुम्ह खः। वसपोल थौं न्हिनसिया १.०५ बजे मदुगु घोषणा याःगु खः ।
वसपोल वंगु ताः ई न्ह्यवंनिसें किड्नी सम्बन्धी ल्वचं ग्रस्त जुयाच्वंम्ह खःसा वालय् निक्वः डायलासिस यायेमाःगु अवस्था जुयाच्वंगु खः। तर वंगु छवाःनिसें वसपोलया डायलासिस यायेगु ज्या नं बन्द जूगु खः। स्वास्थ्यस्थिति कमजोर जुइवं वसपोलयात मोडल अस्पतालय् भर्ना याःगु खः ।
वि.सं. १९८३ स तानसेन पाल्पाय् वसपोलया जन्म जूगु खः। नेपाःया थेरवादी बुद्ध धर्म धिसिलाकेगु ज्याय् वसपोलया तःधंगु योगदान दु। राणा शासकतय्सं देशं पितिना छ्वःपिं च्याम्ह थेरवादी भन्तेपिं मध्ये जीवित दनिम्ह वसपोल अन्तिम भन्ते खः। बुद्ध धर्मया मुख्य ग्रन्थ त्रिपिटक कण्ठ वःम्ह जुयाः वसपोलयात त्रिपिटकाचार्य उपाधिं छाय् पियातःगु दु। नेपालभाषां नं आपालं कृति च्वयाबिज्याःगुलिं वसपोलयात 'भाषाथुवाः' उपाधिं नं विभूषित यानातःगु दु ।
वसपोलया शवयात थौं मोडल अस्पतालं यंकाः बुद्ध विहारय् निं तइगु जूगु दु। वयां लिपा कन्हय् आनन्दकुटी विहारय् यंकीगु ग्वसाः दु। अन कन्हय् व कंस अन्तिम संस्कार याइगु जूगु दु। वसपोल आनन्दकुटी विहारया प्रमुख नं खः ।
