रीना व सुरेशयात जरिमैंया सिरपाः लःल्हात
ख्वप (सन्ध्या टाइम्स)/नेपाल साहित्य मन्दिरया ग्वसालय् म्हिगः थनया अरनिको सभा भवनय् जूगु छगू ज्याझ्वःया दथुइ नेपालभाषाया बाखंच्वमि रीना तुलाधर व कवि सुरेश किरणयात थुगु दँया जरिमैंया साखः लुमंति सिरपाः लःल्हात। पुलांम्ह कलाकार लिसें समाजसेवी रत्नेश्वर प्रधानं वय्कःपिंत उगु सिरपाः लःल्हानादीगु खः। सिरपाः कथं वय्कःपिंत हनापौ, झिद्वः तका दां नापं दोसल्लां न्ययेकेज्या जूगु खः। ज्याझ्वलय् वरिष्ठ कलाकार केदारप्रसाद जोशीयात नं हनेज्या जूगु खः ।
उगु हे ज्याझ्वलय् कवि पूर्ण वैद्यया निबन्ध मुना 'जि छगू अभिव्यक्ति युगया' व बाखंच्वमि तिलक प्रकाशया बाखं मुना ' वयागु हाथ्या' नं विमोचन जूगु खः। सफू विमोचन यानादीम्ह प्रा. माणिकलाल श्रेष्ठं 'जि छगू अभिव्यक्ति युगया' बारे व समालोचक इन्द्र मालीं 'वयागु हाथ्या' बारे समीक्षा नं यानादीगु खः ।
नेपाल साहित्य मन्दिरया नायः तिलक प्रकाशया सभापतित्वय् जूगु उगु ज्याझ्वलय् न्वकु ध्रुव मधिकर्मीं लसकुस यानादीगु खःसा छ्यांज्ये माणिकबाबु ग्वंगं सुभाय् बियादीगु खः। ल्यज्या पुचःपाखें दुजः नवीन चित्रकारं सिरपाः लाःपिं व्यक्तित्वपिनि बारे कनादीगु खः ।
