नेवाः पत्रकारतय् राष्ट्रिय भेलाया तयारी

थ्वहे वइगु चैत ४ गते (चिल्लागा दशमी) जुइगु नेवाः पत्रकार राष्ट्रिय दबूया राष्ट्रिय भेलया तयारी न्ह्याःगु दु । तयारी कथं थीथी संचार माध्यमय् दुपिं नेवाः पत्रकारतय्त भेला यायेगु ज्या जुल । राष्ट्रिय दबू ग्वसाः समितिया सचिवालयं छापा, टेलिभिजन, रेडियो व अनलाइन कथं दयेकूगु कवःया अग्रसरताय् उगु भेला जूगु खः ।

भेल कथं नेवा: पत्रकार राष्ट्रिय दबूया टेलिभिजन कवःया भेलां टेलिभिजन नेवा: पत्रकार स्वनिग: समन्वय समिति नीस्वंगु दु । उगु संयोजन समितिया कजिइ केके मानन्धर व छ्याञ्जेय् शुलिन्द्र शाक्य ल्य:गु दु । अथेहे दुज: कथं राजु नापित भाइकाजी महर्जन, कल्पना महर्जन, विनोद कोजु, विकेन रंजित, शोभा श्रेष्ठ, श्याम श्रेष्ठ, प्रताप महर्जन, विराज श्रेष्ठ, रुपिन डंगोल, नविन जोशी, सुरेश शाही व राजेश श्रेष्ठ ल्य:गु दु ।

अथेहे नेवा: पत्रकार राष्ट्रिय दबूया छापा कवःया ग्वसालय् जूगु भेलां छापा पत्रिका स्वनिग: संयोजन समिति गठन याःगु दु । वंगु सिल्लागा आमै कुन्हु छापा माध्यमया नेवाः पत्रकारतय् भेलां उगु संयोजन समिति नीस्वंगु खः ।

छापा कवःया कजि सुगतरत्न सिन्दुराकारयात हे उगु भेलां संयोजन पुचःया कजिया कथं ल्यःगु दु । संयोजन पुचःया छ्याञ्जे कथं रत्न कृष्ण श्रेष्ठ, दुजलय् शिला साय्‍मि,प्रेरणा शाक्य, जितेन्द्र महर्जन, सानुकाजी महर्जन, नातिकाजि महर्जन, भरत महर्जन, पुष्परत्न ताम्रकार, श्यामक कृष्ण श्रेष्ठ व बाबुबाजी श्रेष्ठ च्वनादीगु दु ।

अथेहे वंगु सिल्लागा एकादशी कुन्हु थीथी एफएम रेडियोय् ज्यसना च्वंपिं पत्रकारतय् भेला जुल । नेवाः पत्रकार राष्ट्रिय पत्रकार सचिवालय दुजः, एफएम कवःया कजि जुनीवज्र वज्राचार्यया सभापतित्वय् उगु मुँज्या जूगु खः ।

नेवाः पत्रकार राष्ट्रिय पत्रकार सचिवालय लिसें एफएम कवःया दुजः राजेन्द्र शाक्यं लसकुस यानादीगु मुँज्याय् कजि श्रीकृष्ण महर्जनं राष्ट्रिय मुँज्याया निंतिं जुयाच्वंगु तयारी यात कयाः जानकारी बियादीगु खः ।

More Stories Like this