पेट्रोल डिजेल मन्त्रालय!

ज्ञानि राजा मानन्धर

थौं सुथय् किजां त्रिपुरेश्वरय् तया वया धाःगुललिं हथाय् पथाय् अन वना निघौ लाइन च्वनेधुंका फुत धकाः पम्प बन्द याना बिइवं वाताहां जुल । व हे इलय् छम्ह पासा नाप लात । वया धापू कथं म्हिगः भद्रकाली नं खालि लिहां वने माःगु दुःख प्वंकल । पासां धाल कि छेँतक लिहां वनेत हे पेट्रोल गाइ ला मगाइ ला थें च्वं धका……… जिगु ट्यांकीं लिकाय् ज्यूसा भतिचा ब्यु धाल ।

पासाया खं न्यना जितः न्हिले वल "आफु त मागी मागी छोरोको बिहे... जिगु बाखं नं छंगु थें खः पासा " । थ्व बेमान चाइनिज बाइक छगु लिटरय् १६ /१७ किमी मिटरं उप्वः मबिइ धुंकल । बागू लिटर ल्यं दनिगु थुकी थनतक वयाबलय् ३/५ किमी ला वने हे धुंकल ल्यं दनि २/५ किमी । छन्त गुलि लिकाना बिइगु जिं …… " जिगु खं न्यना पासा वास्याहां न्हिला हल अले लिपा नापलाय् धका बायाः वन ।

मखु थ्व खायल निगम व न्ह्याम्ह सरकारं वःसां सदां हे जनताया दैनिकी मदय्कं मगाःगु सामानय् तक छाय् राजनिती याना च्वनिगु … जा थुइगु खालिगु ग्यांस सिलिण्डर नीछन्हु दय् धुंकल पसले बिया तइगु तर……!!!
म्हिगः ला ध्याचू नका हय् धुंकल कलंकी लाइन तया बिया च्वंगु दु अन वना काः झासं धाक्व बिया च्वंगु दु धका…….। उकुन्हु बनेपां लोड याना हःगु स्वंगः गाडी जाःगु हीमाल ग्यांस ख्वपय् थ्यंकाः वो लागाया मनु तय्सं गाडीयात लंय् दथुइ हे पनाः गाडी खालि याना ग्यांस काल धाःसांनिसें पसले पसले तक ग्यांस हय्त ग्यानाच्वन हं थिपिं ……थजाःगु घटना अन जक मखु मेथाय् नं जुल धाःगु न्यना । थथे लुटे याना नयेमाःगु अवस्था धइगु बांलाःगु संकेत पक्का हे मखु । तर थुकी च्यूता काईपिं सु ? उकुन्हु संसदय् छम्ह मस्र्या सभासदं तं पिकाल हं थःथाय् छें ग्यांस फुना न्हिच्छि चाःहिलाः नं ग्यांस छगः काय् मफत धका वया मस्त द्यां लात हं …हा…हा…हा….। स्वैत न्यंका च्वंगु सभासद भाजुं …। थःतः अभाव जुबले तिनि तं वल ला……।

जनताया निंति नं थथे हे तं पिकाय् फःसा ज्यूगुनि सभासद भाजु मय्जुपीं थःतला गुबलें समस्या वइ हे मखु धकाः स्युपींसं थःत तक्क मदुबले तिनि न्ववाना हल……॥ यदि धात्थें हे अभाव जुया च्वंगु खःसा वो तंगुलु सभासद थें तुं मेपिंत न ला अभाव हे जुया च्वन ज्वी नि …… ग्वः छम्हस्यां हे न्ववागु मदुनी ……

मखु गुबले जक थजाःगु समस्या मवइगु थन सत्ता व थःगु स्वार्थं याना थुमिसं देश ला छु जनताया न्हि या न्हिथं माःगु आवश्यकता तक हे पू वंके मफय् धुकल । धायेबलय् जलस्रोतया निगूगु तःमी देय् हं तर झिन्यान्हुया छक्वः हितिं लः वःगु मखय् धुंकल व नं लः वइगु न्हि कुन्हु मत वया च्वन धाःसा मेशिनं लः साल की वो मेशिनया सः तायाः लः वल धका मस्युपीं जःखः तय्त सीके थें ज्वीगु … अले १० मिनेट मजानिबले लः सुके जुया वने धुकीगु । लः वयेमा मवयेमा ध्यबा पुला हे च्वनेमाःगु बाध्यता दु । स्वंगू लय् पुलकि ५० ५ जरीवाना पुले माःगु अले हाकनं ख्याच्व बिया च्वनि इलय् ब्यलय् की यदि इलय् हे ध्यबा मपुल धाःसा हिटीया लाइन काटे याय्गु ज्वी धकाः । ख्वालय् च्वंगु न्हाय् प्यनय् छुना च्वंपिनिगु खं ल्हाना ला साध्य हे मजुइ धुंकल ।

लोडसेडिङ थुलि उप्वः जुया वने धुंकल की खँ ल्हाय् मास्ते मवय् धुंकल । काय्या कन्हय्निसें जाँच दु । छें इन्भर्टर भाजुया ब्याट्री डाउन जुया वना च्वंगु छवाः दय् धुकल । छघौ च्याय्त हे धौ धौ ज्वी धुकुगु । निला स्वला दत की न्हूगु ब्याट्री फेरे याना च्वने माःगु । हायल कायल हे ज्वी धुंकल जि ला ।

थ्व लोडसेडिडंग प्राधिकरणं न गुलि जक दुःख बिया च्वंगु झीत । सुक्खा यामय् थथे जुइ धकाः सिइक सिइक नं छाय् सुम्क च्वना च्वंगु खः वो ला उमिसं हे बांलाक स्यु । देशय् बहुदल वल लोकतन्त्र वल गण तन्त्र न वल तर थुकीया उपभोग ला जनता याय् खंगु हे मखुनि ।

बिकासया पुर्वाधारय् मत या गुलि महत्व दु धैगु थिमिसं गथे मथूगु …। गुबलें गुबलें ला नेपा देय् छाय् बुल धका पश्चाताप जुया वय् यः जितः । तर झी नेता धाःपिन्सं बिचा याइगु जुइ शायद उपिं नेपा देय् जन्मे मजूगु खःसा जनतायात थुलि आहत बिइ मखनिगु धका ……। वल वल फसि क्वाः धाःथें न्ह्याम्ह वःसां खालि थः व थः पार्टीया प्वाः जाय्केगुलि जक ब्यस्त । डिजेल प्लान दुत हय् धया च्वंगु धापू थौं कन्हय भतिचा सेले जुया च्वंन …… "जुन गोरुको सिंग छैन उस्को नाम तिखे” धाःथें गूगु देशय् लय् पतिं पेट्रोलीयम पदार्थया हाकाकार जुयाच्वनि अन हे १२ अरब फुका डिजेल प्लान हय्गु हं झी बकंफुसु नेता त । न्यना कथं थुकीया मू ४ निसें ४।५ अरब स्वया उप्प्व मतू हं । कमिशनया हे लोभय् दुत हयेत्यंगु धका न बिपक्षी नेता तय्सं न थुकीया बिरोध याना च्वंगु दु । झी जनतातय्सं थःगु ही चःतीं पुला च्वंगु कर थुमिसं डिजेलय् प्वंकेगु बिचाः याना च्वन थ्व धात्थें हे छ्यल धाःसा झीसं प्रति युनीट ३० निसें ३५ तका तक्क पुले मालेफु हं । डिजेल प्लान सिवें मेगु छुं हे बिकल्प मदु धका च्वयच्वय् धाया च्वंगु खः थिपिं । "लगाया भिगोया धोया………” धाःथें डिजेल प्लान दुहां वल स्वीच अन यात अले झललललललललल…। मत च्याइथें । जनतायात मिखाय् लः क्यंकेगु ज्याय् ला थिपिं तस्कं हे च्वय्च्वय् धाः ।

थिमित ला छु धका कन्हय् छुं जुया थ्व प्लान वल धाय्वं उकीया ब्ववस्थापनया निंति छगू मन्त्रालय चाय्के दइ " डिजेल मन्त्रालय्" क्या न्ह्याइपुसे च्वनी । मन्त्रालय् जक दयां गात ला मन्त्री माल - "डिजेल मन्त्री ” मन्त्री जुइत उप्प्व योग्यम्हला माःगु हे मखु झीथाय् देशय् …। थ्व पदय् ला झन निदं स्वदं पेट्रोल पम्पय् ज्या याना च्वंम्ह दःसा झन हे खासा । वयां लिपा राज्य मन्त्री, सहायक मन्त्री सचिव सुब्बा… आदि आदि…। हाकीमनिसें पियून तक मनूत ला माल ज्या याइपिं………। थथे जुलकी थः फाल्तु लाना च्वंपीं मनु तय्त लजगाः नं दइ । लजगाःया पलेसा जय्जय्कार व साःसाःगु भिंभिंगु कोसेली नं वयेफु । गुलि तक दूरभाषी झी स्वांथ नेतात म्हसिइका दिसँ झी गणतन्त्र नेपाःया जनवादी नेतातय्गु पहः !

थः व थःस्वया च्वय् देय् व देय् या जनता थुमिसं याना थौं झी थासय् लाना च्वंगु दु देशय् हिला वःगु दु । जनताया छुं भतिचा खं त न न्यनेगु झीगु कर्तब्य खः धैगु बोध गुबले तक थिमिगु न्ह्यपुइ दुहां वनी मखु उबले तक झी नेपाःमी तय्सं सुःख सिइ फइमखु ।

More Stories Like this